Ўзбекистонда истиқболли бошқарув кадрларини танлаб олиш бўйича «Тараққиёт» танловининг финал босқичи натижалари эълон қилинди. Бу ҳақда «Дарё»га Инновацион ривожланиш вазирлиги матбуот хизмати маълум қилди.
Танлов комиссиялари таркибида Президент Администрацияси масъул ходимлари, Давлат бошқаруви академияси профессор-ўқитувчилари иштирок этди. Танловнинг якуний босқичи натижасига кўра 50 нафар ғолиб ва 100 нафар финалчи аниқланди.
Танловнинг финал босқичида баҳолаш мезонлари сифатида қуйидаги компетенсиялар белгиланди: бошқарув профессионализми, лидерлик қобилияти, тизимли фикрлаш салоҳияти, ўзгаришларга мослашувчанлик.
50 нафар ғолибга энг кам иш ҳақининг 50 баравари миқдорида, финал босқичида иштирок этган 100 нафар иштирокчига эса энг кам иш ҳақининг 25 баравари миқдорида бир марталик пул мукофоти тўланади.
Шунингдек, танлов ғолиблари тегишли йўналишлар бўйича давлат ташкилотларида раҳбарлик лавозимларига тайинланади ва танловнинг тегишли номинациялари бўйича ривожланган хорижий мамлакатларнинг соҳага оид ташкилотларида стажировка ўтайди.
Танлов финал босқичининг қолган иштирокчилари тегишли давлат ташкилотларининг бошқарув кадрлари захирасига киритилади, шунингдек, иш билан таъминланганидан сўнг танловнинг тегишли номинациялари бўйича ривожланган хорижий мамлакатларнинг соҳага оид ташкилотларида стажировка ўтайди.
Изоҳ (0)