Олий маълумотли фуқароларнинг ҳарбий хизматни ўташ муддати узайтирилади

Олий Мажлис Қонунчилик палатасидаги «Адолат» социал демократик партиясининг 8 июлдаги навбатдаги йиғилишида «Умумий ҳарбий мажбурият ва ҳарбий хизмат тўғрисида»ги қонунга ўзгартириш ва қўшимчалар киритиш ҳақида»ги қонун лойиҳаси муҳокама қилинди. Партия матбуот хизматининг хабар беришича, лойиҳада бир қатор муҳим ўзгартириш ва қўшимчалар кўзда тутилган.

Биринчидан, Олий маълумотли шахслар ва муддатли ҳарбий хизматни чақирув бўйича офицерлар таркиби лавозимларида ўтаётган офицерлар истисно тариқасида муддатли ҳарбий хизматни тўққиз ой ўташган бўлса, киритилаётган ўзгаришга кўра ушбу муддат бир йил этиб белгиланмоқда.

Хабарда айтилишича, Қуролли Кучлар сафига муддатли ҳарбий хизматни ўташга чақирилаётган фуқароларнинг 9—10 фоизини олий маълумотлилар ташкил этади. Мазкур фуқаролар тўққиз ой муддатли ҳарбий хизматни ўтаганидан сўнг Қуролли Кучлар резервига бўшатилиши натижасида қолган уч ой давомида улар эгаллаб турган лавозимлар бўш (вакант) қолиб кетмоқда.

Бунинг натижасида қўшинларда, айниқса, ДХХ Чегара қўшинлари ва ИИВ Қоровул қўшинлари бўлинмаларида кундалик фаолиятда белгиланган вазифаларни бажаришда қийинчилик ва ноқулайликлар келиб чиқмоқда.

«Муддатли ҳарбий хизматни ўтаётган фуқароларнинг бир вақтда Қуролли Кучлар резервига бўшатилиши натижасида оддий аскарлар лавозимларининг уч ой бўш (вакант) бўлиб қолиш ҳолатларига барҳам берилади, натижада жанговар шайликни таъминлашдаги ноқулайликлар бартараф этилади», — дейилади хабарда.

Иккинчидан, чақирилувчиларнинг ҳарбий-техника мутахассисликлари бўйича тайёргарлиги Ўзбекистон мудофаасига кўмаклашувчи «Ватанпарвар» ташкилотининг ўқув муассасаларида амалга оширилар эди. Киритилаётган ўзгаришга биноан, ушбу вазифа Мудофаа ишлари бошқармалари ҳузуридаги чақирилувчиларни ҳарбий-техника мутахассисликлари бўйича тайёрлаш марказларига юклатилмоқда.

Учинчидан, олий таълим муассасаларида кундузги ўқишда таҳсил олаётган талабалар ўз розилиги билан июль—август ойларида сафарбарлик чақируви резерви (бир ойлик) хизматига олинишлари мумкинлиги белгиланмоқда.

Ушбу ҳолат амалдаги қонунчиликка асосан СЧР хизматига 27 ёшгача бўлган фуқароларнинг олиниши, кўрсатилган тоифадаги фуқаролар эса олий таълим муассасасини тамомлагунига қадар 27 ёшга тўлиб қолиши билан боғлиқ. Бу таклифнинг қабул қилиниши фуқаролар учун ҳарбий хизматни ўташда қўшимча имконият яратади.

Қонун лойиҳаси «Адолат» СДП фракцияси йиғилишида консептуал жиҳатдан қабул қилинган.