9 июль куни Қашқадарё вилоятининг Миришкор туманида давлатга 61 минг тонна ғалла топширган фермер хўжаликлари учун ташкил этилган ҳосил байрамида 65–70 центнердан юқори ҳосилдорликка эришган 10 нафар фермерга Президент совғаси — автомобиллар топширилди. Бу ҳақда «Дарё» мухбири хабар бермоқда.
Жорий йил Қашқадарё вилояти миришкорлари давлатга 500 минг тонна ғалла топшириб, режани ортиғи билан бажарди. Мазкур режанинг 61 минг тоннаси Миришкор тумани фермер хўжаликлари ҳиссасига тўғри келади.
Туман ҳокими Равшан Комиловнинг маълумот беришича, жорий йил туман миришкорлари давлатга 60 тонна пилла ва 61 минг тонна ғалла топшириб, юқори натижаларга эришган.
— Ушбу ютуқларимизни нишонлаш учун бугун туманда 500 кишилик байрам дастурхони ташкил этилди ва кам таъминланган оила фарзандлари бўлмиш 6 нафар жуфтликнинг никоҳ тўйи, 24 нафар боланинг хатна тўйи ўтказиб берилди, — дейди туман ҳокими ўринбосари Самариддин Салаев. – Янаям қувонарлиси, туманда жорий йилги мавсумда ғалладан юқори ҳосилдорликка эришган 10 нафар фермерга Президентимиз совғаси — 10 та автомобиль топширилди.
Байрам дастурхонидан сўнг, кечки соат 19:00 да тумандаги марказий стадионда 20 минг киши иштирок этган байрам кечаси ташкил этилди. Оқшомда пойтахтдан ташриф буюрган санъаткорлар чиқиши миришкорликлар қувончига қувонч қўшди.
Байрам оқшомида вилоят ҳокими Зафар Рўзиев, вилоят прокурори Ботир Юсупов, ИИБ бошлиғи Дилшод Турсунбоев ҳамда вилоят ташкилотлари раҳбарлари иштирок этди.
Изоҳ (0)