4 июль куни Асака автозаводида UzAuto Motors компанияси раҳбарияти томонидан журналистлар учун матбуот анжумани ташкил этилди, деб хабар берди «Дарё» мухбири Севара Нишонова.
Матбуот анжуманида UzAuto Motors компанияси бош директори вазифасини бажарувчи Рустам Ражабов монополияга бўлган муносабати ҳақида сўзлаб берди.
«Аввалига монополия нима эканлигига аниқлик киритиб олайлик. Бу якка ишлаб чиқарувчими ёки якка сотувчими?», — деди Рустам Ражабов.
«Кейинги йилларда рақобатчиларимиз пайдо бўлганидан хурсандман. Биргина Россиянинг Lada бренди Ўзбекистонда 11 та салон очган. Уларнинг машинаси яхши, нархиям ҳамёнбоп. Бундан ташқари, Toyota, Mercedes-Бенз, Kia автомобилларини таклиф этаётган салонлар ҳам ишлаб турибди. Ҳозирда харидорларда танлов имконияти борлиги бизни ҳақиқатдан ҳам қувонтиради», — дея сўзларини давом эттиради UzAuto Motors компанияси раҳбари.
Шунингдек, у Ўзбекистонда Renault автомобиллари ишлаб чиқарилиши мумкинлиги ҳақидаги хабарлардан хавотирга тушганини ҳам яширмади:
«Эртага Renault келади дейишяпти. Бу ҳол бизни бироз хавотирга солмоқда. Биз ходимлар билан ўтириб, маслаҳатлашамиз, нима қиламиз, нархини туширамизми, акция қиламизми ёки техник кўрикдан ўтказишга имтиёз берамизми, деб ўйлаймиз».
Рустам Ражабов рақобатчиларнинг борлиги автомобиль бозори ривожланишига туртки бўлишини таъкидлади.
Изоҳ (0)