23 июнь куни БМТнинг Озиқ-овқат ва қишлоқ хўжалиги соҳасидаги ташкилоти (FAO) 41-сессияси олдидан бўлиб ўтган учрашувларда Ташкилотнинг Европа учун 32-ҳудудий конференцияси Ўзбекистонда ўтказилишига доир ташаббус FAO ҳамда 51 та Европа ва Осиё мамлакатлари Қишлоқ хўжалиги вазирлари томонидан қўллаб-қувватланди. Бу ҳақда Ўзбекистон қишлоқ хўжалиги вазирлиги матбуот хизмати хабар берди.
Мазкур ҳудудий конференция 2020 йилнинг 5—7 май кунлари Ўзбекистонда, Марказий Осиё давлатларида орасида илк маротаба ўтказилади. FAOнинг стратегик мақсадлари очликка қарши кураш, қишлоқ хўжалиги, ўрмончилик ва балиқчиликнинг ҳосилдорлик ва барқарорлигини ошириш, қишлоқ ҳудудларида қашшоқликни камайтиришга ҳисса қўшишдир.
Айни пайтда Ўзбекистон қишлоқ хўжалиги вазири Жамшид Ходжаев бошчилигидаги делегация турли мамлакатлар, жумладан, Хитой, Миср, Жанубий Корея, Украина, Қозоғистон, АҚШ, Чили сингари мамлакатлар қишлоқ хўжалиги вазирлари ва бошқа расмий доира вакиллари билан музокаралар олиб бормоқда.
Конференция доирасидаги учрашувларда FAOнинг Ўзбекистондаги янги лойиҳаларини амалга оширишга келишиб олинмоқда.
Изоҳ (0)