Ташкент City лойиҳаси доирасида қурилаётган марказий боғда мадам Тюссо музейининг филиали очилади. Бу ҳақда пойтахт ҳокимлиги матбуот хизмати томонидан тайёрланган Ташкент City қурилиши жараёнининг бориши ҳақидаги видеороликда маълум қилинди, деб хабар берди «Nuz.uz».
Марказий боғнинг умумий майдони 18 гектарни ташкил этади. Ҳозирда бу ерда сунъий кўл яратиш ишлари олиб борилмоқда. Сунъий кўл 15 минг метр квадрат майдонда жойлашади, унда катта мусиқий фаввора ҳам бўлади.
Кўл орқали ўтувчи кўприкнинг узунлиги 50 метрни, ён кўприкларнинг узунлиги эса 18 метрни ташкил этади.
Кўл соҳилида олтита ресторан, икки турдаги болалар майдончалари жойлашади. Боғнинг бир бурчагида Планетариум қурилаади, мадам Тюссо музейи шу ерда жойлашади.Маълумот учун, ҳозирги кунда Лондондаги мадам Тюссо музейининг 23 та мамлакатда филиаллари мавжуд, шундан ўнтаси Осиёда жойлашган.
Марказий боғда шунингдек, 450 кишига мўлжалланган амфитеатр, ўнта мусиқий фаввора ва Ўзбекистонда муқобили бўлмаган қуруқ фавворалар ҳам бўлади.
Фестиваллар ўтказиш учун 2000 кишини сиғдира оладиган пушти боғ барпо этилмоқда. Бу ерда спорт майдончалари, велойўлакчалар ҳам бўлади.
Марказий боғ қурилиши йил охирига қадар якунланиши режалаштирилмоқда.
Изоҳ (0)