Бугун,

  • USD 11095.31
  • RUB 173.84
  • EUR 10772.44

«Дарё»да Қарши шаҳридаги мавжуд 62 та маҳалла масъулларига ҳар ой аҳолидан 10 миллион сўмлик солиқ тушумларини ундириш мажбурияти юклатилгани хусусида мақола эълон қилинганди. Мақола омма эътиборига ҳавола этилгач, фуқароларнинг ўзини ўзи бошқариш органлари фаолиятини мувофиқлаштириш Қарши шаҳар Кенгаши бунга муносабат билдирди.

Фото: «Дарё»

Фуқароларнинг ўзини ўзи бошқариш органлари фаолиятини мувофиқлаштириш Қарши шаҳар Кенгаши раиси Нормурод Ҳамзаевнинг «Дарё»га маълум қилишича, ушбу мақоладан сўнг маҳалла котиблари билан йиғилиш ташкил этилган ва мақолада тилга олинган ҳолатлар муҳокама қилинган.

— Аслида биз топшириқни бошқача бергандик, — дейди Нормурод Ҳамзаев. – Биласиз, маҳалла котиблари ҳар доим халқ орасида. Аҳоли билан ишлайди. Шуни ҳисобга олиб котибларга маҳаллага маълумотнома сўраб келган ёки бирор бир юмуш билан борган фуқароларга солиқдан қарздорлиги бўлса, тўғри тушунтириш беришлари кераклигини сўрагандик. Мажбурият юкламадик. Бу топшириқни баъзи бир котиблар нотўғри тушунган кўринади. Ана шу англашилмовчилик хусусида билдириш учун йиғилиш ташкил этдик. Ва йиғилишда топшириқ бошқача берилганини қайта тушунтирдик.

Маҳалла масъулларининг таклифига кўра, «Дарё» мухбири ҳам иштирок этган йиғилишда сўз олган «Оқтепа» МФЙ котиби Муқаддам Санаева солиқ идораси ходими билан аҳоли хонадонларида бўлиб, солиқ тушумларини ундиришда иштирок этган котиблар ўз вазифасини бажариш ниятида ҳудудга чиққанини билдирди.

Муқаддам Санаевага кўра, маҳалла котиблари аҳолининг солиқдан қарздорлигини айтса-айтмаса, барибир ўша манзилга — аҳоли хонадонига боради. Фурсатдан фойдаланиб, тарғибот ишини ҳам олиб боради.

Йиғилишда иштирок этган маҳалла котиблари «Дарё» мухбирининг 10 миллион сўм ундириш мажбурияти юклатилгани хусусида топшириқ ҳақидаги саволига жавобан, бу каби кўрсаткичлар солиқ идораси ходимининг режасига киритилганини таъкидламоқда.

— Одатда солиқ идораси ходими маҳаллага келиб, шу ой қарздорликдан фалон сўм топширишим керак деб белгиланган суммани айтади, — дейди йиғилишда сўз олган маҳалла котиблари. — Биз эса ўша кўрсатилган суммани йиғишида кўмаклашамиз, холос. Аниқ белгиланган сумма солиқ идораси ходимининг режаси бўлади. Бизда бундай мажбурият йўқ.

Қашқадарё вилояти Давлат солиқ бошқармасининг Жамоатчилик билан алоқалар ва ҳуқуқий ахборот шўъбаси бўлимига қўнғироқ қилиб, ушбу ҳолатга муносабат сўраганимизда, бу ҳақда Солиқ қўмитасига маълум қилишганликларини билдирди.

— Маҳалла котиблари ўзига тегишли вазифаларни бажариш учун тез-тез аҳоли хонадонларида бўлади, — дейди Нормурод Ҳамзаев. – Ўша пайтда солиқ ходимлари ҳам улар билан бирга юриб, яхши билмаган хонадонларида бўлиб, солиқ тушумлари билан шуғулланади. Аммо қайтариб айтаман, бу мажбурият эмас.

Нормурод Ҳамзаев.

Нормурод Ҳамзаев.
Фото: «Дарё»

Аниқланишича, Қарши шаҳридаги 62 та маҳалла фуқароларнинг ер ва мол-мулк солиғидан 8 миллиард 554 миилион 680 минг сўм қарздорлиги мавжуд. Июнь ойининг 10 кунлик ҳисоб-китобига кўра, маҳалла масъуллари саъй-ҳаракати билан жами қарздорликнинг 105 миллиондан ортиғи ундирилган.

— Президентимиз тақиқлаган ишни қилишга ҳаддимиз сиғмайди, — дейди Нормурод Ҳамзаев. – Эл-юрт учун хизмат қилиб, Президент жамоасидан эканлигимизни ҳис қилиб ишлаймиз. Бундан кейин бу каби англашилмовчиликлар ва маҳалла масъулларига зиммасига тааллуқли бўлмаган ҳар қандай топшириқ берилишининг олдини оламиз.

Изоҳ
Асосий янгиликлар
Дунё
Ривожланаётган давлатлар учун фалокат: АҚШ ва Европа ўртасида савдо уруши бўлиши кутиляпти
Маҳаллий
Фарғона ва Наманган аэропортларини қуюқ туман қоплади, рейслар кечикадиган бўлди
Маҳаллий
Қорақалпоғистонда ЙПХ ходими радар ўрнатилган машинасида таксичилик қилгани айтилмоқда (видео)