“Daryo”da Qarshi shahridagi mavjud 62 ta mahalla mas’ullariga har oy aholidan 10 million so‘mlik soliq tushumlarini undirish majburiyati yuklatilgani xususida maqola e’lon qilingandi. Maqola omma e’tiboriga havola etilgach, fuqarolarning o‘zini o‘zi boshqarish organlari faoliyatini muvofiqlashtirish Qarshi shahar Kengashi bunga munosabat bildirdi.
Fuqarolarning o‘zini o‘zi boshqarish organlari faoliyatini muvofiqlashtirish Qarshi shahar Kengashi raisi Normurod Hamzayevning “Daryo”ga ma’lum qilishicha, ushbu maqoladan so‘ng mahalla kotiblari bilan yig‘ilish tashkil etilgan va maqolada tilga olingan holatlar muhokama qilingan.
— Aslida biz topshiriqni boshqacha bergandik, — deydi Normurod Hamzayev. – Bilasiz, mahalla kotiblari har doim xalq orasida. Aholi bilan ishlaydi. Shuni hisobga olib kotiblarga mahallaga ma’lumotnoma so‘rab kelgan yoki biror bir yumush bilan borgan fuqarolarga soliqdan qarzdorligi bo‘lsa, to‘g‘ri tushuntirish berishlari kerakligini so‘ragandik. Majburiyat yuklamadik. Bu topshiriqni ba’zi bir kotiblar noto‘g‘ri tushungan ko‘rinadi. Ana shu anglashilmovchilik xususida bildirish uchun yig‘ilish tashkil etdik. Va yig‘ilishda topshiriq boshqacha berilganini qayta tushuntirdik.
Mahalla mas’ullarining taklifiga ko‘ra, “Daryo” muxbiri ham ishtirok etgan yig‘ilishda so‘z olgan “Oqtepa” MFY kotibi Muqaddam Sanayeva soliq idorasi xodimi bilan aholi xonadonlarida bo‘lib, soliq tushumlarini undirishda ishtirok etgan kotiblar o‘z vazifasini bajarish niyatida hududga chiqqanini bildirdi.
Muqaddam Sanayevaga ko‘ra, mahalla kotiblari aholining soliqdan qarzdorligini aytsa-aytmasa, baribir o‘sha manzilga — aholi xonadoniga boradi. Fursatdan foydalanib, targ‘ibot ishini ham olib boradi.
Yig‘ilishda ishtirok etgan mahalla kotiblari “Daryo” muxbirining 10 million so‘m undirish majburiyati yuklatilgani xususida topshiriq haqidagi savoliga javoban, bu kabi ko‘rsatkichlar soliq idorasi xodimining rejasiga kiritilganini ta’kidlamoqda.
— Odatda soliq idorasi xodimi mahallaga kelib, shu oy qarzdorlikdan falon so‘m topshirishim kerak deb belgilangan summani aytadi, — deydi yig‘ilishda so‘z olgan mahalla kotiblari. — Biz esa o‘sha ko‘rsatilgan summani yig‘ishida ko‘maklashamiz, xolos. Aniq belgilangan summa soliq idorasi xodimining rejasi bo‘ladi. Bizda bunday majburiyat yo‘q.
Qashqadaryo viloyati Davlat soliq boshqarmasining Jamoatchilik bilan aloqalar va huquqiy axborot sho‘basi bo‘limiga qo‘ng‘iroq qilib, ushbu holatga munosabat so‘raganimizda, bu haqda Soliq qo‘mitasiga ma’lum qilishganliklarini bildirdi.
— Mahalla kotiblari o‘ziga tegishli vazifalarni bajarish uchun tez-tez aholi xonadonlarida bo‘ladi, — deydi Normurod Hamzayev. – O‘sha paytda soliq xodimlari ham ular bilan birga yurib, yaxshi bilmagan xonadonlarida bo‘lib, soliq tushumlari bilan shug‘ullanadi. Ammo qaytarib aytaman, bu majburiyat emas.
Aniqlanishicha, Qarshi shahridagi 62 ta mahalla fuqarolarning yer va mol-mulk solig‘idan 8 milliard 554 miilion 680 ming so‘m qarzdorligi mavjud. Iyun oyining 10 kunlik hisob-kitobiga ko‘ra, mahalla mas’ullari sa’y-harakati bilan jami qarzdorlikning 105 milliondan ortig‘i undirilgan.
— Prezidentimiz taqiqlagan ishni qilishga haddimiz sig‘maydi, — deydi Normurod Hamzayev. – El-yurt uchun xizmat qilib, Prezident jamoasidan ekanligimizni his qilib ishlaymiz. Bundan keyin bu kabi anglashilmovchiliklar va mahalla mas’ullariga zimmasiga taalluqli bo‘lmagan har qanday topshiriq berilishining oldini olamiz.
Izoh (0)