АКТ вазирлиги Ҳайъат мажлисида РRTМ ва UzDigital TV фаолияти танқид қилинди
Ўзбекистон Ахборот технологиялари ва коммуникацияларини ривожлантириш вазирлигининг навбатдаги кенгайтирилган Ҳайъат мажлиси бўлиб ўтди. Унда Радиоалоқа, радиоэшиттириш ва телевидение маркази ҳамда UzDigital TV’нинг молиявий-хўжалик фаолияти ва хизматлар ҳажмини кенгайтириш бўйича амалга ошираётган ишлари тўғрисидаги масалалар атрофлича кўриб чиқилди.
Дастлаб Радиоалоқа, радиоэшиттириш ва телевидение марказининг молиявий-хўжалик фаолияти, амалга оширилган ишлар ва истиқболдаги режалари тўғрисидаги ахборот тингланди. Танқидий-таҳлилий руҳда ўтган Ҳайъат мажлисида Радиоалоқа, радиоэшиттириш ва телевидение маркази томонидан республика миқёсида телерадиоузатиш тармоғини эксплуатация қилиш, техник воситалар ишлашининг барқарорлиги ва узлуксизлигини таъминлаш, хизматлар сифатини таъминлаш, муаммоли ҳолатлар юзага келишининг олдини олиш бўйича жорий фаолиятида бир қатор камчиликларга йўл қўйилаётгани қайд этилди.
Ҳайъат йиғилишида, шунингдек, UzDigital TV молиявий-хўжалик фаолияти, хизматлар кўламини ошириш, абонентлар сонини кўпайтириш, дилерлик тармоғини кенгайтириш бўйича амалга оширилган ишлар ва режалари тўғрисида ҳисобот берилди. Муҳокамалар чоғида UzDigital TV томонидан рақамли телевидение хизматлари асосан Тошкент шаҳри ва Тошкент вилояти аҳолисига кўрсатилиши, қолган ҳудудларда абонентлар сони камлиги, UzDigital TV хизматлари турларини ошириш ҳамда абонентлар сонини кўпайтириш бўйича амалга оширилаётган чора-тадбирлар, белгиланган вазифалар ижросини таъминлашда сусткашликка йўл қўйилаётгани таъкидланди.
Ҳайъат мажлисида кўрилган масалалар юзасидан вазирликнинг тегишли бошқарма ва бўлимлари, Ўзбекистон ахборот технологиялари ва оммавий коммуникация ходимлари касаба уюшмаси Республика кенгаши, Ўзбекистон Миллий телерадиокомпанияси мутасаддиларининг Радиоалоқа, радиоэшиттириш ва телевидение маркази ва UzDigital TV фаолиятидаги мавжуд масалалар тўғрисида фикрлари тингланди.
Кун тартибига кўра, Ҳайъат мажлисининг тегишли қарори қабул қилинди. Унга асосан, Радиоалоқа, радиоэшиттириш ва телевидение маркази ва UzDigital TV фаолияти қониқарсиз деб баҳоланиб, иш фаолиятида йўл қўйган камчиликлари учун ҳар икки корхона раҳбариятига нисбатан интизомий жазо чораларини қўллаш ҳамда лавозимига лойиқлик масаласини кўриб чиқиш тавсия этилди.
