Мексика кўрфазида «ўлик зоналар» ҳудуди кенгайиб бормоқда

Жаҳон океанида «ўлик зоналар» деб аталувчи кислородсиз ҳудудлар сони тобора кенгайиб бормоқда, деб хабар беради National Geographic.

Ҳозирги кунда кўпчиликни Мексика кўрфазидаги ҳудудлар ташвишга солмоқда. Бундан бир неча ўн йиллар олдин пайдо бўлган ҳудуд ўлчами об-ҳаво шароитига қараб ўзгариб туради. Луизиана шатати университети тадқиқотчиларининг маълумотларига кўра, жорий йилда ушбу «ўлик зона»нинг ўлчами 20 200 — 22 560 квадрад километрга етиб, рекорд даражани қайд этган. Бу Словения, Сальвадор ёки Исроил давлатларининг ҳудудлари билан тенг демакдир.

Зонанинг катталашишига Миссисипи дарёсига ёмғирларнинг кўп ёғиши сабаб бўлган. Бунинг оқибатида биринчи навбатда фермерлар катта зарар кўрган: кўпчилик қишлоқ хўжалиги маҳсулотларини етиштира олмай қолган. Бироқ ерларга бунга қадар уруғ экилиб, турли кимёвий ўғитлар сепиб бўлинган.  Дарё суви эса уларни ювиб кетиб, кўрфаз томон оқизиб борган.

Бу эса ўз навбатида Луизиана ва Техас штатларининг қирғоқларида сув ўтларининг кескин ўсишига олиб келган. Натижада улар атроф-муҳитдаги кислородни «тортиб ола бошлаган». Кислороднинг камлиги балиқлар, қисқичбақалар ва бошқа сув ости ҳайвонларининг яшаш даражасини пасайтириб юборади.

Олимлар кимёвий ўғитлардан камроқ фойдаланиш лозимлигини таъкидламоқда, чунки бу каби «ўлик зоналар» кўплаб омилларнинг бир қисми халос.