«Детская Новая волна-2019» танловида тошкентлик Милана Пак учинчи ўринни қўлга киритди. У уйга қайтиб кетди: олдинда яна бир ҳафта ўқиш ва хайрлашув оқшомида чиқиш кутмоқда, деб ёзади Sputnik.
«Ўқитувчилар мендан мактабда ўқиш тугаши муносабати билан ўтказиладиган тантанада қўшиқ куйлашимни сўрашди. Мен Human қўшиғини айтаман, уни «Детская Новая волна-2019» финалининг биринчи кунида куйлаганман», — деди Милана Пак Sputnik Ўзбекистон мухбирига.
Милана саккиз ёшида Paris Je t'aime танловида энг яхши қўшиқчи деб топилди. Шу вақтдан бошлаб уни машҳур, гимнастика тарихида етти карра олимпия иштирокчиси, совет ва ўзбекистонлик спортчи Оксана Чусовитина қўллаб-қувватлайди. У Миланага беш юлдуз тасвирланган билагузукни совға қилди. Ёш қўшиқчи таъкидлашича, бу тумор унга ғалаба қозонишга ёрдам беради.
Олег Газманов: «Ўзбекистон сен билан фахрланиши керак»
«Детская Новая волна-2019» танловида Милана Пак унинг вокал-устози Валентина Мартиросян томонидан юборилган аризасига биноан қатнашди.
«У етти ёшимдан менинг энг севимли устозим», — дея тан олди ёш артистка.
«Биз «Детская Новая волна» танловида ўтган йили иштирок этишимиз керак эди, бироқ бора олмадик. Шу вақтнинг ўзида Sanremo Junior танловида қатнашиш учун ариза берганмиз, у ерда финалга чиқдик ва Италияга боришга қарор қилдик. Милана Сан-Ремода биринчи ўринни олди», — дейди Милананинг онаси Ирина Пак.
Вокал танловининг ярим финали Москвада ўтказилди. Унга юзлаб болалар келди, бироқ финалга фақат 10 та давлатдан 12 киши ўтди: Ўзбекистон, Абхазия, Арманистон, Беларусь, Қозоғистон, Литва, Озарбайжон, Буюк Британия, Мальта ва Россиядан уч нафар иштирокчи. Озарбайжонлик хонанда келишидан аввал касал бўлиб қолди ва саҳнага 11 киши чиқди.
Финал босқич машҳур «Артек» болалар лагерида ўтказилди. Танлов ҳайъатига Олег Газманов, Лев Лешченко, Николай Басков, Юлианна Караулова ва Юлия Савичева киритилди. Ҳайъат раиси Россияда хизмат кўрсатган артист Игорь Крутой бўлди.
Ҳайъат аъзолари бу йилда барча финал иштирокчилари жуда кучли эканлигини тан олиб, илк бор ғолибни танлаш қийиш бўлганини айтишди.
«Биз Милана билан Ялтага 10 кунга келдик, шу вақтда тайёргарлик кўрдик. Танлов ташкилотчилар жуда ажойиб – улар нафақат финалчиларга, балки уларга ҳамроҳ қилган кишиларга йўл ва уч маҳал овқатланишни ўз ичига олган яшаш харажатларини тўлаб берди», — деди Ирина Пак.
Милана Пакга танловнинг биринчи кунидаёқ эътибор қаратишди. Ирина олдига ўтган танлов қатнашчилари ва ҳайъат аъзолари ҳам келди.
«Менга ҳайъат аъзоларининг барчаси ёқди. Чунки улар юлдузлар, ҳаммаси яхши қўшиқ куйлашади. Эсимда қолгани, иккинчи куни, ҳаммаси тугаганидан кейин Олег Газманов менга «Ўзбекистон сен билан фахрланиши керак» деб айтди», — деб қўшимча қилди Милана.
https://www.instagram.com/p/ByNEVbkhGB7/?utm_source=ig_embed
«Болалар Евровидение»да иштирок этмайди
Милананинг ота-онаси шоу-бизнесга ҳеч қандай алоқаси йўқ. Отаси – сузиш бўйича спорт устасига номзод, онаси эса спорт гимнастикаси бўйича собиқ иттифоқ устаси. Шунинг учун уларнинг уйида Оксана Чусовитина тез-тез меҳмон бўлади. Ирина Пак у билан 11 йил, терма жамоа таркибида иштирок этган даврдан буён дўст бўлиб келган.
«Ҳар гал Милана танловларда иштирок этган вақтда, Оксана қўнғироқ қилиб, уни қўллаб-қувватлайди ва жуда хавотир олади, маслаҳат беради. Мана бугун ҳам қўнғироқ қилди, яқин кунларда меҳмонга келади», — дейди Ирина Пак.
«Менинг орзуим – жаҳон юлдузи бўлиш. Қайсидир машҳур одам билан қўшиқ куйламоқчиман. Масалан, Ариана Гранде ёки Бейонсе. Яна шифокорликка ўқийман», — айтади Милана.
«Детская Новая волна-2019» танловида учинчи ўрин олиш билан Милана шу йил ноябрь ойида ўтказиладиган «Болалар Евровидение» танловига бориш ҳуқуқини қўлга киритди. Ёш хонандани бу билан табриклашни бошлашди, бироқ у танловда иштирок этмайди.
«Ҳамма Милана совринни қўлга киритган бўлса, Польшада қўшиқ куйлайди деб ўйлади. Бироқ у меҳмон сифатида таклифномасини олди», — дея тушунтиради Милананинг онаси.
Ўзбекистон «Евровидение» танловида иштирок этиш ҳуқуқига эга эмас. Бошида мамлакат бадал тўловини киритиши ва танловни эфирга узатиш учун рухсатнома олиши керак — фақат шулар мамлакат вакилига саҳнага чиқиш ҳуқуқини беради.
«Энди Милана кўпроқ ўқишга эътибор бериши мумкин, чунки вокал, хореография, фортепиано машғулотлари кўп вақтни талаб қилади. Биз учун таълим биринчи ўринда туради», — деб якун ясади Ирина Пак.
Изоҳ (0)