Наманганда анъанавий «Гуллар байрами» фестивали якунига етди. Бу ҳақда «Дарё» мухбири Азизбек Абдувалиев хабар бермоқда.
Ушбу байрам илк бор 1961 йили 16 нафар ҳаваскор гулчи иштирокидан бошланганди. Бугунги кунда уларнинг сони 150 кишидан ошди. Улар сафида 50 йилдан ортиқ вақтдан бери фестивалда қатнашиб келаётганлар бор.
— Илк байрамларининг бирида кактусларни кўриб, уларга ишқибоз бўлиб қолганман. 1965 йилдан бери ўзим ҳам мунтазам иштирок этиб келяпман. Шу пайтгача ўтказилган танловларнинг салкам ярмида ё ғолиб ёки совриндор бўлганман. 1981 йили, боғимизнинг 100 йиллиги муносабати билан ўтказилган байрамда ҳатто автомобиль билан ҳам тақдирлашган. Ҳозир уйимда 1000 дан ортиқ турдаги 5 мингдан зиёд кактус бор. Шу байрам буткул ҳаётимни ўзгартириб юборди, — дейди асли касби математика ўқитувчиси бўлган Жўрахон Мўминов.
Бобур номли истироҳат боғида бу йил 5 миллион тупдан ортиқ турли гуллар экилди. Гулчилар ва корхона-ташкилотлар томонидан 60 дан ортиқ кўргазма, 100 дан ошиқ бадиий композиция намойиш этилди. Илк бор хориждан—Эрондан келган гулчи ҳам иштирок этди.
— Эрондан гуллар элчиси бўлиб Наманганга келдим. Фирмамизда парваришланган гуллардан халқингиз баҳра олаётганидан хурсандман. Келгуси йили мамлакатимиздаги бошқа тадбиркорларни ҳам бу байрамга келишга даъват этаман. Шу ерда, Наманганда гул етиштиришни йўлга қўйиш ниятимиз ҳам йўқ эмас, — дейди Мозандарон шаҳридан келган тадбиркор Муҳаммад Рамазоний.
Фестиваль доирасида Наманган муҳандислик-технология институтида Эрон, Ҳиндистон, Россия ва мамлакат олимлари иштирокида «Ўзбекистонда манзарали гуллар хилма-хиллиги: муаммолар ва ютуқлар» мавзусида халқаро илмий-амалий конференция ўтказилди. Соҳага оид маърузалар тингланди, ўзаро тажриба алмашилди.
«Гуллар байрами» чет элда ҳам кенг ёритилди. Фестивальга Россия, Туркия, Хитой, Эрон ва Қирғизистон ОАВлари вакиллари келди.
—Хабарингиз бор, Истанбулда ҳам бутун дунёга машҳур «Лолалар фестивали» ўтказилади. Ҳар йили баҳорда, апрелда шаҳримиз лолаларга бурканади. Намангандаги фестивалнинг фарқли томони эса бу ерда турфа гулларни кўриш мумкин экан. Улардан тайёрланган турли шакл ва композициялар бизни ҳайратга солди, — дейди Туркиянинг IHA ахборот агентлиги мухбири Япроқ Мутлу.
1 июнь куни Наманган шаҳридаги «Уч фаввора» хиёбонида «Гуллар байрами» ғолиб ва совриндорларини тақдирлаш маросими бўлди. Тадбирда жамоатчилик, оммавий ахборот воситалари вакиллари, адабиёт ва санъат намоёндалари иштирок этди.
59-анъанавий «Гуллар байрами» фестивалида олий ўринга гулчи Азизбек Мамажонов ва вилоят халқ таълими бошқармаси лойиқ деб топилди. Улар диплом ва Spark автомобили билан тақдирланди. Биринчи ўринни эса вилоят олий ўқув юртлари ва гулчи Салоҳиддин Қодиров қўлга киритди.
Номинациялар бўйича ғолибликни қўлга киритган ташкилотлар ва гулчиларга вилоят ҳокимининг ташаккурномаси ҳамда телевизор, компьютер, музлатгич каби совғалар тақдим этилди.
Тақдирлаш маросим бадиий дастурга уланиб кетди.
Ўзбекистон халқ артисти Мирза Азизов, Ўзбекистонда хизмат кўрсатган артистлар Алишер Файз, Яҳёбек Мўминов, эстрада хонандалари Дилшод Раҳмонов, Гули Асалхўжаева, Баҳром Назаров, Баҳриддин Зуҳриддинов, «Ниҳол» давлат мукофоти совриндори Шаҳзода Ҳасанова, «Тошкент зеболари» рақс гуруҳи, Наманган ихтисослаштирилган санъат мактаби йиғма оркестри ва ўқувчилари, «Дуторчи қизлар» ансамблининг чиқишлари совриндорлар ва томошабинлар учун яна бир совға бўлди.
Изоҳ (0)