Америкалик гангстер Франк Лукас вафот этди

Машҳур америкалик гангстер Франк Лукас вафот этди. Бу ҳақда Deadline хабар берди.

88 ёшли жиноятчи 30 майда Нью-Жерси касалхонасига олиб кетилаётган пайтда вафот этди.

1960—1970 йилларда Лукас Нью-Йоркка юқори сифатли героин етказиб берувчи сифатида танилган. Унинг мижозлари машҳур, етакчи тадбиркорлар ва сиёсатчилар эди. У бир марта Вьетнамдан гиёҳванд моддаларни тобутларга, ўлик ҳарбий хизматчиларнинг жасадлари билан бирга юборганидан фахрланар эди, чунки бундай юк одатда текширилмайди. Бир мунча вақт давомида гиёҳванд моддалар савдоси унга кунига бир миллион доллар олиб келди.

1975 йилда Лукас қўлга олинди ва 70 йил қамоқ жазосига ҳукм қилинди. 1991 йилда Лукас озодликка чиқди.

2007 йилда Лукаснинг ҳаёти ҳақида ҳикоя қилувчи «Америкалик гангстер» фими суратга олинган. Ушбу фильмда Лукас образини Дензел Вашингтон ижро этган.