Жаҳон соғлиқни сақлаш ташкилоти 1988 йилда 31 майни Халқаро чекишга қарши кураш куни деб эълон қилган.
Тошкент тиббиёт академияси матбуот хизмати берган маълумотга кўра, ҳар йили глобал тамаки эпидемияси деярли 7 миллион ўлим ҳолатларига олиб келади. Улардан 900 мингдан ортиғи чекмайдиган, лекин тамаки тутуни таъсири остида қолган одамлардир.
Тамаки нафақат нафас йўллари ва аъзолари касалликларини, балки юрак-томир тизими касалликларини хам келтириб чиқаради. Чекиш юрак ишемик касаллиги, инсульт ва периферик томирлар касалликлари ривожланишининг энг хавфли омилларидан биридир.
Дунё бўйича юрак-томир тизими касалликлари туфайли бошқа ҳар қандай сабаблардан кўра кўпроқ одамлар вафот этмоқда. Тамаки истеъмол қилиш ва тамаки иккиламчи тутунининг таъсири эса юрак-томир тизими касалликларини келтириб чиқарувчи артериал гипертониядан кейин иккинчи ўринда турувчи хавфли омил ҳисобланади.
Жаҳон соғлиқни сақлаш ташкилоти мутахассисларининг Ўзбекистонда катталар орасида чекишнинг тарқалганлиги тўғрисидаги охирги кўрсаткичларига асосланган прогнозларига кўра, ҳозирги 2,8 миллион тамаки истеъмол қилувчиларнинг 1,4 миллион (50 фоиздан)дан ортиғи чекиш билан боғлиқ барвақт ўлим хавфига дучор бўлади. Агар тамакига қарши курашиш бўйича янада фаолроқ чоралар амалга оширилмаса, бу рақам янада ортиши мумкин.
Изоҳ (0)