Ўзбекистонда Renault автомобиллари пайдо бўлиши мумкин

Ўзбекистонда Renault автомобиллари пайдо бўлиши мумкин, деб ёзади Spot.

Республикага автомобиль етказиб бериш истаги ҳақида 15 май куни бўлиб ўтган ўзбек-француз бизнес-форуми давомида Renault Group’нинг МДҲга экспорт қилиш бўйича бошқарувчи директори Максимилиан Миссан маълум қилди:

«Биз бу ерда салоҳият борлигини биламиз, (Ўзбекистон) бозорини таҳлил қилдик. Биламизки, (истеъмолчиларнинг) маълум кутилмалари бор», — деди Spot’га берган интервьюсида компания вакили.

Миссаннинг сўзларига кўра, компания мамлакат бозорига Lada (Renault гуруҳининг бир қисми) автомобилларини етказиб бериш билан мамлакат бозорига чиқишни бошлади.

«Энди биз Renault’ни тақдим этмоқчимиз ва ўзбек истеъмолчиларига худди шундай маҳсулот ва хизмат кўрсатиш сифатини таклиф қилиш истагидамиз», — дейди Максимилиан Миссан.

Бунинг учун компания вакили солиққа тортиш ва сертификатлаштириш бўйича ёрдамга муҳтож эканликларини қайд этди.

Максимилиан Миссан таъкидлашича, компания «ўзбекистонлик ҳамкасблари билан Nissan платформасида ҳамкорлик қилиш» имкониятини кўриб чиқмоқда.

Renault Group (Renault, Dacia, Alpine, Renault Samsung Motors, Lada брендлари) 1898 йилда ташкил этилган Франция автомобиль компанияси бўлиб, 134 мамлакатда фаолият олиб боради, 39 та заводга эга. 2018 йил якунларига кўра компания 3,9 миллион автомобиль сотди, даромад эса 57 миллиард евродан ошди.