Алишер Навоий номидаги Ўзбекистон Миллий кутубхонасида «Баркамол авлод — Ватан фахри» таълим лойиҳасининг Экспертлар кенгаши йиғилиши бўлиб ўтди. Унда Тошкент шаҳридаги 64-умумтаълим мактаби ўқувчиларининг энг яхши илмий ишлари тақдим этилди, деб ёзади ЎзА.
Мазкур лойиҳа 2010 йилда «Шарқ аёли» халқаро аёллар жамоат фонди томонидан ишга туширилган.«Лойиҳам Subpay деб номланади ва бу метрополитендан фойдаланишда инновацион тўлов тизими лойиҳаси бўлиб, унинг мақсади тўлов тизимини яхшилаш. Биламизки, ҳозир метрода жетонлардан фойдаланилади. Бу технологиялар ривожланаётган XXI аср учун бироз эскирган усул. Лойиҳа ўз ичига 3 та элементни олади, улар тўлов карточкаси, мобил илова ва турнекетларга керакли ўзгартиришларни киритиш. Натижада йўловчи узоқ навбатларда туриб жетон сотиб олишига ҳожат қолмайди, карточкага ўзига керакли маблағни истаган усулида тўлаб фойдаланади. Карточкани турнекетга яқинлаштиришнинг ўзи кифоя. Бу каби инновацион усуллардан ривожланган давлатлар фойдаланишади, бизнинг лойиҳанинг афзаллиги тўлов тизимининг анчайин соддалаштирилгани. Лойиҳани янада ривожлантиришда устозларим ҳам маслаҳат бермоқда. Келгусида ахборот технологиялари бўйича таълим олишни давом эттирмоқчиман», – дейди Тошкент шаҳридаги 64-умумтаълим мактаби 8-синф ўқувчиси Камолиддин Қаҳҳоров.
Бундан ташқари ўқувчилар тақдим этган илмий ишлар орасидан «Маркетинг», «Бахт – бу нима?», «Микроорганизмлар ва сиз», «Шовқин ва инсон учун унинг оқибатлари» каби қизиқ мавзулардаги лойиҳалар ўрин олган.
Тадбирда ҳар бир маърузачининг нутқи катта қизиқиш билан тингланди, илмий ишларнинг долзарблиги ва амалий аҳамияти баҳоланди. Экспертлар кенгаши аъзолари тадқиқотчиларнинг меҳнатсеварлиги ва қобилиятларини юксак баҳолади ва лойиҳа иштирокчилари дипломлар билан тақдирланди.
Изоҳ (0)