Фарғонада жорий йилнинг 4 ойи давомида жиноят ишлари бўйича судлар томонидан Жиноят-процессуал кодексининг 83-моддасига асосан 7 нафар шахс оқланди. Бу ҳақда Журналистлар ижодий уюшмаси Фарғона вилоят бўлими томонидан ОАВ вакиллари учун ўтказилган матбуот анжуманида маълум қилинди.
Ёшлар иттифоқи томонидан 83 нафар, хотин-қизлар қўмитаси томонидан 3 нафар, маҳалла фуқаролар йиғинлари томонидан 38 нафар шахсга нисбатан берилган кафиллик судлар томонидан инобатга олиниб, судланувчиларга нисбатан енгилликлар берилган.
Жиноят ишлари бўйича вилоят, туман ва шаҳар судларининг иш юритувига 1153 нафар шахсга нисбатан 890 та жиноят иши келиб тушган бўлиб, 1261 нафар кишига нисбатан 1002 та жиноят иши тугатилган.
Матбуот анжуманида Жиноят ва Фуқаролик ишлари, Иқтисодий ва Маъмурий суд раислари иштирок этди ҳамда журналистларни қизиқтирган саволларга жавоб берди.
— Суд-ҳуқуқ тизими билан боғлиқ мавзуларни ёритиш жуда масъулиятли. Демак, ОАВ вакиллари учун қонуншунослар, ҳуқуқни муҳофаза қилувчи идоралар мутахассислари иштирокидаги ўқув семинари ҳам ташкил этиш лозим. Уюшма қошида яқинда «Ҳуқуқий журналистика клуби» очилиб, иш бошлади. Бугунги тадбирда вилоят суд идоралари ва журналистларнинг бу каби мулоқотлари мунтазам равишда ўтказилиши бўйича келишиб олинди, – дейди Журналистлар ижодий уюшмаси вилоят бўлими раиси Муҳаммаджон Обидов.
Изоҳ (0)