Давлат божхона қўмитаси раиси Муроджон Азимов бошчилигидаги делегация Бирлашган Араб Амирликлари ва Кувайтда бўлиб, мазкур мамлакатларнинг замонавий логистика терминаллари ва божхона омборлари фаолияти билан яқиндан танишди. Бу ҳақда «Дарё»га қўмита ахборот хизмати маълум қилди.
Сафар доирасида Кувайт божхона маъмурияти ва БАА федерал божхона маъмурияти олий комиссари билан мамлакатлар ўртасида божхона иши соҳасида ўзаро ҳамкорлик бўйича музокаралар ўтказилди.
Делегация аъзолари Кувайтдаги Anham fzco компанияси логистика терминали билан танишди. 2004 йилдан бери муваффақиятли фаолият олиб бораётган мазкур компания харидларни амалга ошириш ва маҳсулотларни дунёнинг турли давлатларидаги 300 дан ортиқ мижозлар, хусусан улгуржи харидорлар ва супермаркетлар тармоқларига етказиб бериш бўйича катта тажрибага эга.
Фаолият кўлами, транспорт оқими ва товар айланмасининг катталигига қарамай, мазкур компания «Товарларни етказиб бериш занжирини бошқариш тизими» орқали ўз ишини тизимли ва бир маромда йўлга қўйган.
Кувайт божхона маъмурияти раҳбари Жамол ал-Желавий билан ўтказилган музокараларда тадбиркорлик, инвестициялар ва ўзаро савдони ривожлантиришда божхона соҳасидаги узоқ муддатли ҳамкорликни йўлга қўйиш бўйича фикр-мулоҳазалар алмашилди.
Кувайт томонида Ўзбекистондан узум, мева-чева ва полиз маҳсулотларини етказишни ташкил қилиш, шунингдек, Ўзбекистонда кўчмас мулк харид қилиш масалалари алоҳида қизиқиш уйғотди.
Масалан, Anham fzco компанияси қишлоқ хўжалиги маҳсулотларини мамлакатга Жанубий Америкадан ҳаво йўллари орқали 20 соатда етказаётган бўлса, Ўзбекистондан парвозлар орқали бу турдаги маҳсулотларни етказишга атиги 3 соат кифоя қилади. Бу эса Ўзбекистоннинг қишлоқ хўжалиги маҳсулотлари экспорти учун янги имкониятлар эшигини очади.
Шунингдек, мазкур компания вакиллари ўз товарларини Афғонистонга етказишда Сурхондарё вилоятидаги логистика маркази имкониятларидан кенг фойдаланишга ҳам алоҳида қизиқиш билдирди.
Музокаралар якунига кўра иккала мамлакат ўртасида божхона иши соҳасида ҳамкорлик ва ўзаро ёрдам бўйича келишув ишлаб чиқишга ва уни Ўзбекистон—Кувайт савдо-иқтисодий ҳамкорлиги бўйича ҳукуматларо комиссиясининг навбатдаги йиғилишида имзолашга келишиб олинди.
БААга сафар давомида эса Дубай халқаро аэропорти божхона хизмати ва қатор логистика терминаллари фаолияти билан яқиндан танишилди.
Дубай халқаро аэропортининг божхона хизмати божхона назоратининг энг сўнгги замонавий технологиялари, видеокузатув тизими, металлизлагичлар, назорат-рентген ускуналари, шахсий кўрикни божхона ходимининг аралашувисиз ўтказишга имкон берувчи инсон танасини сканерловчи ускуналар билан таъминланган.
Мазкур аэропортда кунига 70 мингдан ортиқ йўловчи парвозларни амалга оширади. Уларни божхона назоратидан самарали ўтказилишида видеокузатув ва назорат-рентген аппарати тасвирлари билан ишлайдиган автоматлаштирилган мониторинг тизими муҳим рол ўйнайди.
Шунингдек, ҳаво транспортлари, йўловчилар ва уларнинг багажларига доир дастлабки ахборотларни олдиндан тақдим этиш тизими мавжуд ресурслар ва иш кучини тўғри тақсимлаш имконини беради.
БАА федерал божхона маъмурияти олий комиссари Али Саид Матар Ал-Неяди Ўзбекистонда қурилиши режалаштирилган божхона терминалларини бунёд этишда араб компаниялари билан ўзаро ҳамкорликнинг йўлга қўйилаётганига юқори баҳо берди. Музокаралар давомида томонлар икки мамлакат ўртасида олиб ўтилаётган товарлар ҳақида дастлабки ахборотларни электрон алмашинувини йўлга қўйишнинг техник талабларини ишлаб чиқиш бўйича келишувга эришди.
Ўзбекистонда бунёд этилаётган йирик 9 та божхона терминали — замонавий логистика марказларининг қурилишида БАА божхона хизмати тажрибасини кенг татбиқ этишга алоҳида эътибор қаратилади.
Сафарнинг энг муҳим янгиликларидан яна бири давлат божхона хизмати органлари ходимларининг ушбу мамлакатда малакасини ошириш ва экспертлар алмашуви орқали БААдаги мавжуд илғор тажриба ҳамда амалиётни ўрганиш масаласида ҳам жиддий қадам қўйилди.
DP World компанияси раиси Султон Аҳмад бин Сулаем билан бўлиб ўтган учрашувда у маҳаллий компания билан ҳамкорликда чегара-божхона постларига туташ ҳудудда замонавий божхона терминаллари ҳамда Навоий вилоятида қуруқлик портини бунёд этишда ҳам ҳамкорликка тайёр эканлигини маълум қилди. Бу эса «Бир макон, бир йўл» лойиҳасидаги ташаббусларни амалга оширишда Ўзбекистонинг хал қилувчи аҳамият касб этишида муҳим ўрин тутади.
2005 йилда ташкил қилинган мазкур компания дунёдаги учинчи йирик порт оператори бўлиб, 78 та денгиз ва қуруқликдаги терминалларига эга. Дунёнинг барча қитъаларидаги 40 дан ортиқ мамлакатда ўз фаолиятини йўлга қўйган компания ўз йўналишида жаҳон бозорининг 6.7 фоизига эгалик қилади.
Мазкур компания билан ўтказилган музокаралар якунига кўра фаолиятнинг муҳим йўналишлари бўйича самарали ҳамкорликни амалга ошириш юзасидан «Йўл харитаси» ишлаб чиқишга келишиб олинди.
«Йўл харитаси» Форс кўрфази мамлакатларига Ўзбекистондан қишлоқ хўжалиги, озиқ-овқат ва тўқимачилик маҳсулотларини экспорт қилиш, Ўзбекистоннинг транспорт-транзит ва логистика салоҳиятини кучайтиришда мазкур компания тажрибасини ўзлаштириш каби масалаларни қамраб олади.
Изоҳ (0)