Ижтимоий тармоқларда тарқалган «Андижонлик йигит уни ИИБ 1-бўлими бошлиғи калтаклаганини иддао қилди» номли ҳабар ҳамда шу мазмундаги Ички ишлар вазирлиги виртуал қабулхонасига қилинган мурожаат Андижон вилоят ИИБ томонидан ўрганиб чиқилди.
2019 йилнинг 12 апрель куни Андижон шаҳри, Бўстон даҳасида яшовчи Дилноза Исмоилова Ички ишлар вазирлиги виртуал қабулхонасига мурожаат қилган.
Унда 1992 йилда туғилган ўғли Ҳасанбой Исмоилов жорий йил 6 апрель куни соат 24.00лар чамасида Бўстон даҳасидаги компьютер ўйинлари клубидан 5-6 нафар таниши билан чиқаётган вақтида ички ишлар ходимлари ушлаб, Андижон шаҳар ИИО ФМБ 1-сон ИИБга олиб кириб, у ерда уни нафсониятига тегувчи сўзлар билан ҳақорат қилганлиги, ўғли ҳуқуқини талаб қилганида бўлим бошлиғи ўринбосари билан бирга унга тан жароҳати етказганлиги, сўнг ўзлари чиқиб кетиб, бошқа ходимларни киритиб, ариза қилмайсан деб шарт қўйишганини билдирган.
Ўғли «ариза қилмайман» деб оғир аҳволда ИИБдан чиқиб, тонгги соат 05.00 атрофида уйга келганлиги, унинг бўйин қисми кўкаргани, нафас олишга қийналаётганлиги, оқсоқланиб юрганлигини кўриб, вилоят касалхонасига олиб бориб ётқизганлигии, ўғлига тан жароҳати етказган бошлиқ ва ўринбосарига тегишли жазо беришни сўраган.
Ҳолат бўйича 2019 йил 16 апрель куни Андижон шаҳар прокурори Ички ишлар бошқарма бошлиғи номига хизмат текшируви ўтказиш бўйича тақдимнома юборган. Мазкур ҳолат юзасидан Андижон вилояти ИИБ Кадрлар бошқармаси томонидан хизмат текшируви ўтказилган.
Унда аниқланишича, 2019 йил 7 апрель куни жамоатчилик вакили Абдулбосит Даминов Андижон шаҳар ИИБ 1-сонли ИИБ бошлиғи номига ариза билан мурожаат қилиб, унда тунги хизматга бириктирилган вақтида маъмурий бинога олиб келинганлар билан ўтказилган профилактик-огоҳлантирув ишлари давомида унга нисбатан тунги хизматда ички ишлар органлари ходимлари томонидан олиб келинган Ҳасанбой Исмоилов шахсини баён қилиш ўрнига унга нисбатан нотўғри муносабатда бўлиб, белгиланган тартибларга амал қилмасдан у билан тортишиб кетганлигини баён қилган.
Хизмат текшируви давомида Ҳ.Исмоилов ва жамоатчилик вакили А.Даминов ҳамда шу вақтда атрофда бўлганларнинг кўргазмаларида қарама-қаршиликлар вужудга келаётганлигини инобатга олиб, Ҳ.Исмоиловнинг танасида енгил тан жароҳатлари борлиги ҳақида суд тиббий экспертиза хулосаси берилганлиги ҳамда Ҳ.Исмоиловга ушбу жароҳатлар қай ҳолатда ва ким томонидан етказилганлигига аниқлик киритиш мақсадида, суриштирув давомида тўпланган ҳужжатлар ҳуқуқий баҳо бериш учун Андижон шаҳар прокуратурасига юборилган.
Изоҳ (0)