АПЛда чемпионлик ҳал бўладиган кун: «Ман Сити» «чайкалар» меҳмони бўлади, «Ливерпуль» эса «бўрилар»ни қабул қилади

12 май, якшанба куни футбол бўйича Англия Премьер лигасининг сўнгги 38-тур баҳслари бўлиб ўтади.

Мусобақа жадвалида етакчилик қилаётган «Манчестер Сити» клуби сафарда «Брайтон»ни синовдан ўтказади. Эслатиб ўтамиз, «шаҳарликлар» аввалги турда «Лестер»ни Венсан Компанининг голи эвазига мағлубиятга учратганди (1:0).

Унаи Эмери қўл остидаги Лондоннинг «Арсенал» жамоаси «Бёрнли» меҳмони бўлади. Маълумот учун, «тўпчилар» 37-турда «Брайтон» билан дуранг ўйнаганди (1:1).

Мусобақа жадвалида 3-ўринда бораётган Лондоннинг бошқа бир клуби «Челси» Брендон Рожерс бошлиқ «Лестер»га қарши майдонга тушади. Қайд этиш жоиз, «аристократлар» аввалги турда «Уотфорд» дарвозасига жавобсиз 3 та тўп киритганди (3:0).

Келаси мавсум Европа Чемпионлар Лигасида иштирок этишдан мосуво бўлган «Манчестер Юнайтед» ўз майдонида «Кардифф Сити»ни қабул қилади. Маълумот учун, «қизил иблислар» 66 очко жамғарган ҳолда мусобақа жадвалида 6-ўринда бормоқда.

Сўнгги турда «Борнмут»га 0:1 ҳисобида ютқазиб қўйган Лондоннинг «Тоттенҳэм» клуби ўз уйида «Эвертон» билан ўйнайди. Эслатиб ўтамиз, «шпорлар» Европа Чемпионлар Лигаси ярим финалида «Аякс» билан икки ўйин натижасига кўра дуранг ўйнаганди (3:2, 0:1), бироқ лондонликлар меҳмонда урилган голлар эвазига ғалабани илиб кетганди.

94 очко жамғариб, мусобақа жадвалида иккинчи ўринни эгаллаб турган Юрген Клопп бошқарувидаги «Ливерпуль» клуби «Энфилд»да «Вулверҳэмптон» билан баҳсга киришади. Барча учрашувлар Тошкент вақти билан соат 19:00 да бошланади.

Таъкидлаш жоиз, «қизиллар» охирги турда «Ньюкасл» устидан 3:2 ҳисобида ғалаба қозониб, муҳим 3 очкони қўлга киритганди.

37-турдан сўнг мусобақа жадвалидаги ҳолат: