Бутунжаҳон бокс ассоциацияси (WBA) профессионал боксчиларнинг апрель ойи учун янги рейтингини эълон қилди. Унда Шаҳрам Ғиёсов яна кучли 15 таликка қайтди. Бу ҳақда GoSport хабар берди.
Супер енгил (-63,5 кг) вазн тоифасида рингга чиқаётган Шаҳрам Ғиёсов (8 та ғалаба, 6 та нокаут) апрель ойи рейтингида 14-ўринга жойлашди. У февраль ойи учун чиқарилган рейтингда кучли 15таликка киритилмаганди. Шаҳрам апрель ойи сўнгида америкалик Эммануэль Тейлорни очколар ҳисобида мағлубиятга учратиб, WBA International чемпионлик камарини қўлга киритганди.
Янгиланган рейтингда иккинчи ярим енгил (-55,34 кг) вазн тоифаси вакили Муроджон Аҳмадалиев (6 та ғалаба, 5 та нокаут) 1-ўринни бой берди ва бир поғона пастлаб 2-ўринга жойлашди.
Эслатиб ўтамиз, 26 апрелдан бошлаб 90 кун давомида Муроджон Аҳмадалиев Даниэл Романга қарши бир йўла иккита камар чемпионлиги учун жанг қилади.
Шунингдек, рейтингда супер ярим ўрта (-69,85 кг) вазн тоифасида рингга чиқаётган Исроил Мадримов (2 та ғалаба, 2 та нокаут) бир ой олдинги кўрсаткичидан бир поғона пастлаб, 7-поғонадан жой олган. Супер енгил (-63,5 кг) вазн тоифасида битта жанг ўтказган Шоҳжаҳон Эргашев (16 та ғалаба, 14 та нокаут) эса рейтингда 4-ўринда қолган.
Рейтингда ўзбекистонлик бошқа спортчилар ўрин олмаган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)