Қорақалпоғистонда иккита паспорт билан икки жойдан пенсия олаётган фуқаро аниқланди, деб хабар бермоқда ЎзА Ўзбекистон Республикаси Молия вазирлиги ҳузуридаги Бюджетдан ташқари Пенсия жамғармаси матбуот хизматига таяниб. Бу ҳолат масофадан ўтказилаётган ўрганишлар натижасида аниқланган.
Қорақалпоғистон Республикаси Нукус шаҳрида яшовчи фуқаро Т.Е.га илк бор 1994 йил 18 мартдаги ногиронлик пенсия тайинлашни сўраб ёзган аризаси ва тиббий-меҳнат экспертиза комиссияси томонидан берилган ногиронлик маълумотномасига асосан Нукус шаҳар собиқ Ижтимоий таъминот бўлими томонидан 2-гуруҳ ногиронлик пенсияси тайинланган ва 2018 йил 30 ноябрига қадар тўлов амалга ошириб келинган.
Мазкур ҳолатларни ўрганиш жараёнида фуқаро Т.Е.нинг иккита фуқаролик паспорти мавжудлиги натижасида икки жойдан пенсия олиб келгани маълум бўлган.
Жумладан, Нукус шаҳар собиқ Ижтимоий таъминот бўлими томонидан ногиронлик пенсияси тайинланган бўлса-да, 2004 йил 27 майда Нукус тумани ҳудудига доимий яшаш учун рўйхатга олинган янги паспорти (иккинчи паспорт) ва 2004 йил 23 июнда тиббий-меҳнат экспертиза комиссияси томонидан берилган ногиронлик маълумотномаси ҳамда бошқа ҳудуддан пенсия олиши тўғрисида маълум қилмаган. Оқибатда Нукус туман собиқ Ижтимоий таъминот бўлимига ёзган аризасига асосан пенсия тайинланиб, 2009 йил 30 сентябрга қадар нотўғри тўловлар амалга оширилган.
Маълумки, Ўзбекистон Республикасининг «Фуқароларнинг давлат пенсия таъминоти тўғрисида»ги қонунига мувофиқ, давлат пенсияларининг бир неча хилларини олиш ҳуқуқига эга бўлган фуқароларга уларнинг ўзлари танлаган битта пенсия тайинланади.
Фуқаро Т.Е.га иккита паспорт билан иккита ҳудуд орқали тўланиши оқибатида жами 14,3 миллион сўм ортиқча тўлов сарфлангани аниқланди.
Мазкур ҳолат юзасидан ҳуқуқий баҳо бериш учун материаллар ҳуқуқни муҳофаза қилиш идорасига ўтказилган.
Изоҳ (0)