Бугун замон кимники, дерсиз? Ҳа, балли – иш билганники. Ўша иш билган одам эса, боз устига денг, ҳаёт синовларида тобланган, илмнинг камолотига етган инсон билан ҳаммаслак бўлса, унинг маслаҳатларига қулоқ тутса, омад-у муваффақият ўша томонда, деяверинг.
«Микрокредитбанк» АТБнинг Ўзбекистон Республикаси Фанлар академияси академиги, физика-математика фанлари доктори, профессор, ЎзФАнинг Математика инстутути директори Ш.А.Аюпов билан ҳамкорлиги ҳам шу тарзда давом этмоқда.
Бироз илмийроқ тил билан ифодалайдиган бўлсак, иқтисодиётнинг инновацион ривожланишини таминлаш, академик илм-фаннинг таълим ва ишлаб чиқариш билан интеграциясини кучайтириш, шу йўл билан бошқарувни такомиллаштириш, фан-таълим ривожида интеллектуал салоҳиятдан самарали фойдаланиш бўйича ҳазилакам ишлар қилингани йўқ.
Биргина мисол. Бошқарувнинг замонавий ва илғор услубларини ўргатиш йўли билан банк мутахассисларининг ишбилармонлик кўникмалари-ю етакчилик маҳоратини шакллантириш ва такомиллаштириш мақсадида –Республиканинг энг кўзга кўринган ҳамда етакчи олимлари иштирокида банк фаолиятига бағишланган семинарлар, мижозлар молиявий саводхонлигини оширишга йўналтирилган тадбирлар сурункали тарзда ўтказилмоқда.
Худди шундай навбатдаги тадбир Нукусда, «Микрокредитбанк» акциядорлик-тижорат банкининг Қорақалпоғистон Республикаси минтақавий филиали ҳамда барча туман филиаллари ходимлари, қолаверса, Қорақалпоғистон давлат университети талабалари учун ташкил қилинди.
Тадбирда давлатимиз раҳбари ташаббуси билан рақамли иқтисодиёт ва унинг республикамиз тараққиётидаги ўрнининг ошиб бораётгани тўғрисида, шунингдек, Ўзбекистонда банк-молия тизимида амалга оширилаётган ислоҳотлар мазмун-моҳияти ва уларнинг дастлабки самаралари тўғрисида фикрлар алмашилди.
Самимий мулоқотларда «Микрокредитбанк» томонидан кўрсатилаётган хизматлар, мижозларга яратилган қўшимча қулайликлар ҳамда келгусида тадбиқ этилиши мўлжалланаётган инновацион лойиҳалар ҳақида маълумотлар тақдим қилинди.
Изоҳ (0)