Норматив-ҳуқуқий ҳужжатлар муҳокамаси порталида «Мактабгача, умумий ўрта, ўрта махсус, касб-ҳунар ва мактабдан ташқари давлат таълим муассасалари педагог кадрларини аттестациядан ўтказиш тартиби тўғрисидаги низомга ўзгартириш ва қўшимча киритиш ҳақида»ги ҳукумат қарори лойиҳаси жойлаштирилди.
Ҳужжат Вазирлар Маҳкамасининг 2016 йил 7 апрелдаги 107-сон қарори билан тасдиқланган низомга ўзгартиришлар киритишни кўзда тутади.
Қарор лойиҳасида биринчи ва олий малака тоифали, етакчи ва бош ўқитувчи лавозимидаги ҳамда мазкур малака тоифалари ва лавозимларга талабгор педагог кадрларни аттестациядан ўтказганлик учун энг кам ойлик иш ҳақининг 100 фоизи миқдорида йиғим ундирилиши ҳақидаги банд сақланиб қолинди. Мазкур йиғим Вазирлар Маҳкамаси ҳузуридаги Таълим сифатини назорат қилиш давлат инспекцияси ҳисобига йўналтирилади.
Шу билан бирга, иккинчи малака тоифали ҳамда ушбу малака тоифасига талабгор педагог кадрларни аттестациядан ўтказганлик учун энг кам ойлик иш ҳақининг 50 фоизи миқдорида йиғим ундирилиши ҳақида қўшимча киритилмоқда.
Ўрнатилаётган йиғим Халқ таълими вазирлиги ҳузуридаги Халқ таълими соҳасидаги ислоҳотларга кўмаклашиш жамғармасига йўналтирилади. Шунингдек, аттестация учун зарур бўладиган назорат-синов материалларини шакллантириш ва ўтказиш билан боғлиқ харажатларни қоплаш ҳамда ушбу жараёнга замонавий ахборот технологияларини жорий этиш ва жалб этилган мутахассислар меҳнати учун сарфланади.
Изоҳ (0)