«Дарё»га келиб тушган навбатдаги мурожаатга кўз югуртирганимизда, ота-оналар ҳасратидан чанг чиқади. Мурожаат матнида шундай мисралар бор: «1940 йилда қурилган «авария» ҳолатидаги боғчада тарбияланаётган болаларимиз тақдири бизни ўйлантирмоқда...».
«Дарё» мухбири вазиятни ўрганиш мақсадида Шаҳрисабз туманининг «Чоршанбе» қишлоғида жойлашган 8-сонли мактабгача таълим муассасасига йўл олди.
— Қурилганига 80 йил бўлган 35 ўринли боғчамизда 75 нафар бола таълим-тарбия олмоқда, — дейди мурожаатчи ота-оналардан бири Фотима Турсунова. – Ўтган давр мобайнида боғча бирор марта ҳам таъмирланмаган. Машғулот хоналари қоронғи, зах ва болаларимиз ҳаёти учун жуда хавфли ҳолатга келиб қолган. Ушбу муаммони ечиш учун 5 йилдан бери мутасаддилар эшигини қоқамиз. Аммо фойдаси бўлмаяпти. Ҳеч ким эътибор қаратмайди.
Ота-оналарнинг айтишича, боғча девори хом ғиштдан иборат бўлиб, том қисмига плита ётқизилган. Ёмғирдан зарар кўрган деворлар қулаб тушиш арафасида.
— Хом ғиштдан қурилган боғча девори нам тортиб қолганлиги боис ҳам томига ёпилган плита бизни хавотирга солмоқда, — дейди Гулчеҳра Иботова. – Фарзандларимиз тақдири бизни ўйлантиряпти. Қўрқамиз шу бинода тарбияланаётганидан.
Ҳудудда яшовчи аҳоли вакилларининг сўзига кўра, улар муаммога ечим излаб туман мактабгача таълим бўлими ва туман ҳокимлигига бир неча бор мурожаат қилган.
— Туман мактабгача таълим бўлими ва ҳокимиятга бир неча маротаба мурожаат қилдик, — дейди Гулҳайё Тўраева. – Аммо ҳар сафар «қилиб берамиз» дейишдан нарига ўтишмайди. Кун сайин боғча биноси болалар ҳаёти учун хавфли ҳолатга келиб қолмоқда.
Боғча тарбиячиси Дилсўз Валиева ёмғирли кунларда боғча тарбиячилари болаларни қўйиб, чакки ўтган жойларни тозалаш билан андармон бўлишини айтмоқда.
— Агар ёмғир ёғса, ҳамма жойдан чакки ўтади. Ҳатто ичкарига ҳам лой оқиб тушади, — дейди Дилсўз Валиева. – Биз тарбиячилар болажонларни қўйиб, чакки ўтган, лой тушган жойни тозалаш билан овора бўлиб қоламиз.
Аниқланишича, ҳудудда боғчага талаб шу қадар кўпки, жой етишмаса-да ота-оналарнинг ўзи битта каравотга 2 нафар бола ётишига ҳам рози бўлган.
— Боғча тарбиячилари болаларимиз билан жуда яхши ишлашлари боис ҳам «майли битта каравотга 2 нафар бола ётса ҳам фарзандимга шу боғчадагилар таълим-тарбия беришсин» деганмиз, — дейди ота-оналардан яна бири Феруза Мусурмонова. – Мутасаддиларга борсак, боғча талабга жавоб бермайди «ёпамиз» дейишади. Боғчани ёпиб қўйишса, бизнинг фарзандларимиз нима қилади? Ҳудудимиздаги кўпчилик ота-оналар ишлайди. Шунинг учун ҳам боғчага эҳтиёжимиз катта.
Ота-оналар ва боғча тарбиячилари «Дарё» мухбири билан суҳбат давомида 2018 йил боғчага янги жиҳоз ва мебеллар келтирилгани, бироқ боғча талаб даражасида бўлмагани боис, қайтариб олишганини билдирмоқда.
— Боғчамизга 2018 йил ёз ойида янги жиҳоз ва мебеллар олиб келишди, — дейди ота-оналар ва боғча тарбиячилари. – Аммо боғчамиз эски бўлгани учун талабга жавоб бермайди деб, жиҳозларни қайтариб олиб кетишди.
Ушбу боғчада 30 йилдан бери меҳнат қилиб келаётган Сабоҳат Маҳматқулованинг маълумот беришича, ўтган йиллар давомида боғча бирор марта ҳам таъмирланмаган. Ҳар йили боғча ишчилари ўзи пул йиғиб, таъмирлаш ишларини олиб боради.
Боғча мудираси Сабоҳат Абдуназарова тарбиячиларнинг боғча таъмирланмаганлиги тўғрисидаги гапини тасдиқлаб, фақатгина 2015 йил боғча ҳожатхонаси қулаб тушгандан сўнггина 20 миллион сўм маблағ ажаратилганлигини айтди.
— 2015 йил ҳожатхонамиз қулаб тушди, — дейди Сабоҳат Абдуназарова. – Ўшанда 20 миллион сўм маблағ ажратишди. Ҳақиқатдан ҳам ўтган йиллар давомида боғча бирор марта ҳам таъмирланмаган.
Боғча мудирасининг маълумот беришича, мазкур «Чоршанбе» қишлоғидаги 8-сонли болалар боғчаси ва «Чорқи» қишлоғидаги филиалида жами 150 нафар бола тарбияланади. Асосий бинода 75 нафар, филиалда 75 нафар. Журналистик суриштирувларимиз давомида биз билан суҳбатда бўлган ота-оналардан Гулида Раҳимова, Умида Бойматовалар қўшни қишлоқда яшашса-да, фарзандларини айнан шу боғчага олиб келишларини билдирмоқда.
— Боғча тарбиячилари яхши таълим-тарбия беради, — дейди 9–10 километр масофадаги қўшни қишлоқдан келувчи ота-оналар Умида Раҳимова ҳамда Умида Бойматовалар.
— Боғчамиз аҳволи ёмон эканлигини, талабга жавоб бермаслигини туман ҳокимлигига ҳам айтганмиз, — дейди мактабгача таълим бўлими мудири Дилором Имомова. – Шу боисдан ҳам ҳокимимиз келган пайти, ушбу боғча аҳволи қониқарли эмаслигини, шунинг учун ҳам боғчани тезда ёпиш кераклиги ҳақида топшириқ берган. Ёпамиз десак, ота-оналар «фарзандларимиз қаерга боради» деб қаршилик кўрсатишмоқда. Уларнинг гапига кўнадиган бўлсак, фарзандларимиз ҳаётини хавф остида қолдирамиз-ку.
— Туман ҳокими аҳволимизни кўргач, тезда бу боғчани ёпиб, ёнимиздаги мактабга кўчишимиз кераклигини айтди, — дейди боғча мудираси Сабоҳат Абдуназарова. — Аммо кўчиб ўтганимиздан сўнг, ўқитувчилар ва туман халқ таълими норозилиги билан яна эски биномизга қайтдик.
Дилором Имомованинг маълумот беришича, туман ҳокими ташаббуси билан 2019 йилнинг январь ойида ҳудудда жойлашган 30-умумтаълим мактабининг ўз вақтида боғча учун дея қурилган, 120 ўринли бўш биносини боғчага олиб беришган. Аммо Халқ таълими вазирлигининг эътирози билан иш тўхтаган.
— Туман ҳокими боғча аҳволини кўргач, тезда ёпиш кераклигини, боғча учун эса бошқа ҳудуддан жой топиш лозимлигини айтди, — дейди Дилором Имомова. – Шунинг учун ҳам ҳудудда жойлашган 30-умумтаълим мактабининг бўш турган ва ўз вақтида боғча учун қурилган 120 ўринли биносини олиб, боғча болаларини кўчирмоқчи бўлдик. Ҳатто боғчани кўчирдик ҳам. Аммо мактаб ўқитувчиларининг қаршилигига учрадик.
Маълум бўлишича, ҳудудда жойлашган 30-умумтаълим мактаби 1076 ўринли бўлиб, айни кунда мактабда 700 нафарга яқин бола бир «смена»да таҳсил олади. Ҳудуд аҳолисининг гувоҳлик беришича, мактабнинг 120 ўринли биноси ҳақиқатдан ҳам бўш бўлган. Аммо туман ҳокимлигининг боғчани кўчириш ташаббусидан кейин, мактаб раҳбарияти бўш бинога кутубхона ташкил этган. Холбуки, мактаб кутубхонаси алоҳида бинода жойлашган.
Шаҳрисабз туман халқ таълими бўлими мудири Шуҳрат Рўзиев бинодан фойдаланишга рухсат бериши учун вазирлик рухсати кераклигини айтмоқда.
— Ҳақиқатдан ҳам 1076 ўринли 30-сонли умумтаълим мактабида 700 нафар ўқувчи таҳсил олади, — дейди Шаҳрисабз туман халқ таълими бўлими мудири Шуҳрат Рўзиев. – Аммо бинодан фойдаланишга рухсат беришимиз учун Халқ таълими вазирлигининг рухсати керак-да. Майли рухсат олишса, фойдаланишсин. Биз топшириқни бажарадиган ходиммиз.
Боғча маъмурияти ва ота-оналарнинг қўшимча қилишича, ҳудуддаги тез ёрдам биноси аслида боғча учун қурилган бўлиб, бундан 2 йил илгари туман тиббиёт бирлашмаси балансига олинган. Ва айни кунда тез ёрдам биноси сифатида фойдаланиб келинмоқда.
Туман мактабгача таълим бўлими масъули Дилором Имомова ушбу ҳудудда касб-ҳунар коллежи ҳам жойлашгани, айни кунда коллеж ётоқхонаси ҳам бўш ва фойдаланилмаётганлигини айтмоқда. Имомовага кўра, масъуллар коллеж ётоқхонасини беришларини сўраб ҳам мурожаат қилишган. Аммо бунга алоқадор бошқармалар ҳозирча рухсат беришмаган.
— Ёнимиздаги коллеж ётоқхонасини ҳам сўрадик, мактабнинг бўш турган биносига киришга ҳаракат қилиб кўрдик, ҳатто тез ёрдам биносини ҳам олишга уриндик, — дейди Дилором Имомова. — Бироқ фойдаси бўлмаяпти-да. Туман ҳокимлиги ва мактабгача таълим бўлими бу ишга астойдил киришган. Аммо бу масала туман миқёсида ҳал бўлмаяпти-да. Вилоятдаги масъул раҳбарлар ҳам бу ишга кўмаклашишса мақсадга мувофиқ бўларди.
Шаҳрисабз туманининг «Чоршанбе» қишлоғидаги 8-сонли боғча муаммосини омма эътиборига ҳавола қилишдан мақсад, мутасаддиларнинг ушбу жиддий масалага ўз вақтида эътибор қаратишларини истаганимиздан. Бинобарин ушбу даргоҳда 75 нафар қора кўз таълим-тарбия олаётган экан, ҳеч кимсанинг ушбу фарзандлар ҳаётини хавф остида қолдиришга ҳаққи йўқ...
«Дарё» таҳририяти доимгидек мутасаддилар ҳаракатини кузатади.
Изоҳ (0)