2019 йил 1-чорагида Давлат молиявий назорати бош бошқармаси ва унинг ҳудудий бошқармалари томонидан 1993 та назорат тадбири ўтказилди. Бу ҳақда Молия вазирлиги маълум қилди.
Ўтказилган назорат тадбирлари натижасида жами 70,2 миллиард сўм миқдорида бюджет интизомини бузилиш ҳолатлари ва бошқа ноқонуний харажатлар аниқланди (2018 йил биринчи чорагида 30 миллиард сўм бўлган).
Назорат тадбирларида аниқланган 23,4 миллиард сўм бюджет интизомини бузиш, пул ва товар моддий бойликлар камомади, шунингдек, мақсадсиз ва асоссиз харажатлардан 19 миллиард сўми бюджетга тикланиши таъминланди.
Давлат молиявий назорати бош бошқармаси ва унинг ҳудудий бошқармалари томонидан бюджет маблағларининг мақсадли сарфланиши юзасидан назорат тадбирларида замонавий ахборот коммуникация технологиялари ва маълумотлар базаси воситасида камерал назоратдан кенг фойдаланилди.
Камерал назорат ўтказилган муассасалардан 205 тасида меъёрий ҳужжатларга амал қилмаган ҳолда 8 миллиард ўмлик хато ва камчиликларга йўл қўйилганлиги аниқланиб, назорат тадбири давомида асоссиз ва ноўрин харажатлардан 1,3 миллиард сўми тикланиши таъминланди. 2,7 миллиард сўм асоссиз сарфланишининг олди олинди ҳамда назорат тадбирларида аниқланган 5,6 миллиард сўм қонунбузилиш ҳолатлари бўйича 92 та назорат тадбирлари ҳужжатлари ҳуқуқни муҳофаза қилиш органларига юборилди.
Ҳукумат ва ҳуқуқни муҳофаза қилиш органларининг қарорлари ва топшириқларига асосан 164 та хўжалик юритувчи субъектда молиявий хўжалик фаолияти юзасидан назорат тадбири ўтказилган бўлиб, аниқланган 18,9 миллиард сўм миқдоридаги молиявий қонунбузилиш ҳолатлари бўйича назорат тадбирлари ҳужжатлари қонуний чора кўриш учун прокуратура органларига юборилди.
Изоҳ (0)