Ички ишлар вазири ўринбосари Муҳиддин Жўраевнинг Қашқадарё вилояти Ички ишлар бошқармасида бўлиб ўтаётган сайёр қабулида, вазир ўринбосари тоби қочган мурожаатчидан шахсан ўзи хабар олиб, мурожаатчи муаммосини тиббиёт хонасининг ўзида ҳал этди. Бу ҳақда «Дарё» мухбири хабар бермоқда.
— Вазир ўринбосари келади дейишгани учун келгандим, — дейди мурожаатчи Робия Файзиева. – Кутилмаганда аҳволим ёмонлашиб, ўзимни ёмон ҳис қила бошладим. Барака топишсин шифокорлар тезда тиббий ёрдам кўрсатишди. Вазир ўринбосарининг шахсан ўзи аҳволимдан хабар олиб, шу ернинг ўзида мутасаддиларни чақириб, анча вақтдан бери ҳал этилмаётган уй масаласи ва моддий ёрдам олиш борасидаги муаммоимни ҳал қилиб берди. Жудаям миннатдорман.
Маълум бўлишича, Робия Файзиеванинг турмуш ўртоғи Ички ишлар тизимида фаолият юритган бўлиб, касаллик туфайли 2015 йил вафот этган. Шундан сўнг Робия Файзиева 3 нафар фарзанди билан ёлғиз қолган.
— Айни кунда уларнинг яшаш учун уйи ҳам йўқ эди, — дейди Қарши шаҳар ҳокими ўринбосари Муҳайё Юсупова. — Ижарада истиқомат қилиб келишарди. Шунинг учун шаҳар ҳокимлиги ижтимоий оғир аҳволга тушиб қолган Робия Файзиевага ёрдам кўрсатиб, 2 хонали уйнинг дастлабки бадал тўловини тўлаб берадиган бўлди.
— Ижарадан айни кунгача бўлган 1,5 миллион сўм қарздлорлигимни ҳам моддий ёрдам тариқасида тўлаб берадиган бўлишди, — дейди мурожаатчи Робия Файзиева.
Сайёр қабул давомида айни пайтгача 200 га яқин мурожаатчилар қабул қилинди ва уларни қийнаётган муаммолар мутасаддилар иштирокида ҳал этилмоқда.
Изоҳ (0)