Ҳукумат фармойиши чиққанига 4 ой бўлди. Тошкентда Абдулла Қодирий уй-музейини ташкил этиш масаласи жойидан силжимади
Ўтган йил февралида Абдулла Қодирий уй-музейи ташкил этилишига оид мақола эълон қилинганди. Унда Абдулла Қодирийнинг неваралари, хусусан, Хондамир Қодирий бобосининг уйини музейга айлантириш бўйича бир қанча идораларга мурожаат қилиб, ҳафсаласи пир бўлгани баён қилинганди. Бу ҳақда ЎзАда Анора Содиқова эслатиб ўтган.
Мақола чоп этилгач, 2018 йил 3 декабрда Вазирлар Маҳкамасининг фармойиши эълон қилинди. Ҳужжатда октябрь ойида Абдулла Қодирийнинг 125 йиллик юбилейи мамлакат миқёсида кенг нишонланиши бўйича кўрсатма берилган.
Шунингдек, фармойишда Тошкент шаҳридаги Абдулла Қодирий номидаги маданият ва истироҳат боғи, адиб яшаб ижод қилган «Самарқанд дарвоза» кўчасидаги 36- ва 37-уйларда Абдулла Қодирий уй-музейи ташкил этилиши айтилган.
Фармойиш эълон қилинганига 4 ой бўлди. Шунга қарамай, жойларда ўзгариш йўқ ва тегишли идораларга қўнғироқ қилиб, бу борада бирон иш қилингани бўйича тузукроқ маълумот ололмадик.
Маданият вазирлигининг Музейлар ва кутубхоналарни ривожлантириш бошқармаси ходими бизга вазирлик ваколати доирасига музей қуриш вазифаси кирмаслигини айтиб, бу борада Тошкент шаҳар ҳокимлигига мурожаат қилишни маслаҳат берди.
Ёзувчилар уюшмаси ходимининг айтишича, уюшма Абдулла Қодирий уй-музей масаласи билан шуғуллана олмайди. Уюшманинг вазифаси Абдулла Қодирий асарлари, унинг ҳаёти ва ижоди мавзулари бўйича тадбирлар ва конференциялар ўтказишдан иборат.
Вазирлар Маҳкамасининг фармойишига кўра, Абдулла Қодирийнинг уй-музейи ташкил этилиши, хонадонни таъмирлаш ва атрофини ободонлаштириш вазифаси Тошкент шаҳар ҳокимлиги ҳузуридаги «Ягона буюртмачи хизмати» инжинеринг компаниясига юкланган.
Компания вакили билан суҳбатда шу нарса аён бўлдики, улар фармойиш ёки бошқа ҳужжат билан умуман таниш эмас.
Тошкентда ўзгаришлар катта. Йирик бинолар қурилмоқда, «сити»лар яратилмоқда.
Шундай бунёдкорликлар сафида бугунги кунлар, адабиёт учун жон фидо қилган қаҳрамон — Абдулла Қодирийнинг уй-музейи ҳам ўрин олса, нур устига нур бўлар эди.
Дарвоқе, бугун Абдулла Қодирий таваллуд топганига 125 йил тўлди.
