O‘tgan yil fevralida Abdulla Qodiriy uy-muzeyi tashkil etilishiga oid maqola e’lon qilingandi. Unda Abdulla Qodiriyning nevaralari, xususan, Xondamir Qodiriy bobosining uyini muzeyga aylantirish bo‘yicha bir qancha idoralarga murojaat qilib, hafsalasi pir bo‘lgani bayon qilingandi. Bu haqda O‘zAda Anora Sodiqova eslatib o‘tgan.
Maqola chop etilgach, 2018-yil 3-dekabrda Vazirlar Mahkamasining farmoyishi e’lon qilindi. Hujjatda oktabr oyida Abdulla Qodiriyning 125 yillik yubileyi mamlakat miqyosida keng nishonlanishi bo‘yicha ko‘rsatma berilgan.
Shuningdek, farmoyishda Toshkent shahridagi Abdulla Qodiriy nomidagi madaniyat va istirohat bog‘i, adib yashab ijod qilgan “Samarqand darvoza” ko‘chasidagi 36- va 37-uylarda Abdulla Qodiriy uy-muzeyi tashkil etilishi aytilgan.
Farmoyish e’lon qilinganiga 4 oy bo‘ldi. Shunga qaramay, joylarda o‘zgarish yo‘q va tegishli idoralarga qo‘ng‘iroq qilib, bu borada biron ish qilingani bo‘yicha tuzukroq ma’lumot ololmadik.
Madaniyat vazirligining Muzeylar va kutubxonalarni rivojlantirish boshqarmasi xodimi bizga vazirlik vakolati doirasiga muzey qurish vazifasi kirmasligini aytib, bu borada Toshkent shahar hokimligiga murojaat qilishni maslahat berdi.
Yozuvchilar uyushmasi xodimining aytishicha, uyushma Abdulla Qodiriy uy-muzey masalasi bilan shug‘ullana olmaydi. Uyushmaning vazifasi Abdulla Qodiriy asarlari, uning hayoti va ijodi mavzulari bo‘yicha tadbirlar va konferensiyalar o‘tkazishdan iborat.
Vazirlar Mahkamasining farmoyishiga ko‘ra, Abdulla Qodiriyning uy-muzeyi tashkil etilishi, xonadonni ta’mirlash va atrofini obodonlashtirish vazifasi Toshkent shahar hokimligi huzuridagi “Yagona buyurtmachi xizmati” injinering kompaniyasiga yuklangan.
Kompaniya vakili bilan suhbatda shu narsa ayon bo‘ldiki, ular farmoyish yoki boshqa hujjat bilan umuman tanish emas.
Toshkentda o‘zgarishlar katta. Yirik binolar qurilmoqda, “siti”lar yaratilmoqda.
Shunday bunyodkorliklar safida bugungi kunlar, adabiyot uchun jon fido qilgan qahramon — Abdulla Qodiriyning uy-muzeyi ham o‘rin olsa, nur ustiga nur bo‘lar edi.
Darvoqe, bugun Abdulla Qodiriy tavallud topganiga 125 yil to‘ldi.
Izoh (0)