10 апрель куни Қарши шаҳрида Қашқадарё вилоят ҳокимлиги ҳамда вилоят жисмоний тарбия ва спорт бошқармаси ташаббуси билан вилоят ҳокимлиги биносидан «Ватанпарварлар боғи» ҳудудигача бўлган масофада «Амир Темур издошлари марафони» ўтказилди. Бу ҳақда «Дарё»га вилоят ҳокимлиги матбуот хизмати маълум қилмоқда.
Вилоят ҳокимлиги хабарига кўра, марафонда вилоятда фаолият олиб бораётган барча ташкилот раҳбарлари ва ишчи ходимлари, халқ таълими, ўрта махсус касб-ҳунар таълими муассасалари ўқувчилари, олий таълим муассасалари талабалари, туман (шаҳар) ҳокимликлар вакиллари, маҳаллалардаги уюшмаган ёшлар, уй бекалари, нуронийлар ва меҳнат фахрийларидан иборат қарийб 100 минг нафар киши иштирок этган.
Марафон Президентнинг 2017 йил 3 июндаги «Жисмоний тарбия ва оммавий спортни янада ривожлантириш чора-тадбирлари тўғрисида»ги қарори ҳамда 2019 йил 19 март куни Ўзбекистон Президенти Шавкат Мирзиёев раҳбарлигида бўлиб ўтган 5 та муҳим ташаббус тўғрисидаги йиғилиш баёни ижросини таъминлаш, аҳолининг барча қатламини жисмоний тарбия хусусан, оммавий спортга кенг жалб этиш мақсадида ташкил этилган.
Марафон якунида «Амир Темур издошлари марафони» ғолиблари ташкилотчилар томонидан диплом ҳамда қимматбаҳо эсдалик совғалар билан тақдирланди.
Изоҳ (0)