Андижон вилояти ИИБ махсус жанговар бўлинмалари томонидан қуролланган ўта хавфли гуруҳни қўлга олиш ва гаровга олинган фуқароларни озод қилиш бўйича вилоят ИИБ бошлиғи раҳбарлиги остида махсус-тактик ўқув машғулоти ўтказилди. Буҳақда вилоят ИИБ матбуот хизмати «Дарё»га хабар бермоқда.
Жамоат тартибини сақлаш, фуқаролар хавфсизлигини таъминлаш, ҳуқуқни муҳофаза қилувчи идораларнинг жанговар шайлигини кўрикдан ўтказиш мақсадида ташкил этилган ўқув машғулоти давомида бир гуруҳ қуролланган шахсларни Андижон шаҳар ҳудудидаги маҳаллалардан бирида вақтинча истиқомат қилиб кетаётганлиги аниқланиб, бир вақтнинг ўзида махсус режалар ҳаракатга келтирилди. Шу билан бирга мазкур маҳалла ҳудудида тезкор профилактика ва ялпи қидирув тадбирлари ўтказилди.
Ўқув режасига кўра маҳалладан қочиб, яширинишга уринган бир гуруҳ қуролланган шахслар Андижон шаҳар ҳудудидан чиқиб кетишга ҳаракат қилди. Бироқ Андижон шаҳрининг ташқи ҳалқа қисмида хизмат олиб бораётган ходимларнинг қаршилигига дуч келиб, шаҳар ичига яшириниб олди.
Қуролланган ўта хавфли гуруҳ таъқибдан яшириниш мақсадида йўл четидаги қурилиш ишлари олиб борилаётган бинони эгаллаб, бинодаги ишчиларни гаровга олди. Террорчилик ҳаракатлари содир этишни мақсад қилган қуролланган шахсларни қўлга олиш ва уларни зарарсизлантириш бўйича махсус операция ўтказилиб, гаровга олинган шахслар озод этилди.
Андижон шаҳрида ўта хавфли ва қуролланган жиноятчиларни қўлга олиш, улар томонидан гаровга олинган фуқароларни озод этиш жараёнида қўмондонлик штабининг фаолияти ўрганилди. Фавқулодда вазиятлар содир бўлганда шахсий таркибнинг тўғри қарор қабул қилиши, белгиланган вазифа ва топшириқларни маҳорат билан бажариши кўрикдан ўтказилди.
Ўқув машғулоти давомида махсус вазифаларни бажарувчи сафарбарлик отряди хизматчиларининг амалий кўникмалари намойиш қилинди. Машғулотлар якунида ички ишлар органлари шахсий таркибининг жанговар ва касбий тайёргарлигига баҳо берилиб, ҳаракатлар давомида йўл қўйилган камчиликлар юзасидан топшириқлар белгилаб берилди.
Изоҳ (0)