Самарқанд вилоятининг барча шаҳар-туманларида Самарқанд вилоят ИИБ ва вилоят прокуратурасининг масъул ходимлари иштирокида қидирувдаги шахсларнинг оила аъзолари билан учрашув бўлиб ўтди. Вилоят прокурорининг биринчи ўринбосари Сирожиддин Эшқувватов, вилоят ИИБ бошиғининг биринчи ўринбосари Фарҳод Ҳасанов раислигида, жойлардаги ҳокимлик, прокуратура, ИИБ раҳбарлари ва кенг жамоатчилик иштирокида ўтказилган очиқ мулоқотда қидирувдаги шахсларни ўз ватанига қайтиб келишлари юзасидан тушунтириш ишлари олиб борилди.
Самарқанд вилоят ИИБ Жиноят қидирув бўлимининг «Дарё»га маълум қилишича, юқорида баён этилган тушунтириш ишлари натижасида Пастдарғом туман ИИБ томонидан қидирувда бўлган 44 нафар, Нуробод тумани ИИБ томонидан қидирувда бўлган 19 та шахснинг оила аъзолари билан учрашувлар ўтказилган. Олиб борилган тушунтириш ишлари натижасида қидирувдаги шахсларнинг икки нафари ўз ихтиёри билан яшаш манзилига қайтиб келган.
Бундан ташқари Каттақўрғон шаҳрида қидирувда бўлган 46 нафар шахснинг икки нафари, Иштихон туманида қидирувда бўлган 21 нафар шахснинг бир нафари, Пахтачи тумандан қидирувда бўлган 19 нафар шахснинг бир нафари, Самарқанд туманидан қидирувдаги бўлган 39 нафар шахснинг икки нафари, Ургут туманида қидирувдаги бўлган 56 нафар шахснинг икки нафари қайтиб келган.
Оқдарё туманида ИИБ томонидан қидирувда бўлган 31 нафар шахснинг биттаси ўз ихтиёри билан яшаш манзилига қайтиб келган. Нарпай туманидан 17 нафар қидирувдаги шахсларнинг бир нафари ўз ихтиёри билан яшаш манзилига қайтиб келган.
Қидирувда бўлиб, Ўзбекистонга қайтган шахсларнинг ўз ихтиёрлари билан қайтиб келиб, ҳуқуқни муҳофаза қилувчи органларига мурожаат қилганликлари инобатга олиниб, уларга нисбатан муқаддам қўлланилган «қамоқ» тарзидаги эҳтиёт чоралари ўзгартирилиб, қонунда белгиланган енгиллаштирувчи ҳолатлар қўлланилган.
Вилоят ИИБ ва вилоят прокуратураси раҳбарияти томонидан ҳамкорликда қидирув йўналишида амалга оширилган тадбирлар натижасида вилоят ИИБ бўйича қидирувдаги шахсларнинг қолдиғи 2018 йил 1 март ҳолатига 1061 нафарни ташкил этган бўлса, жорий йилнинг шу даврида эса 824 нафарни ташкил этмоқда.
Изоҳ (0)