2019 йил 28 февраль куни соат 22:40 ларда Бўстонлиқ тумани, Ғазалкент шаҳри, Чирчиқ кўчаси, 34-уйда яшаган, 1980 йилда туғилган I.У. исм-шарифли аёлнинг мурдаси ўз ётоқхонасида турли тан жароҳатлар билан топилган. Бу ҳақда Бош прокуратура матбуот хизмати маълум қилди.
Бундан ташқари, марҳуманинг 2003 йилда туғилган фарзанди А.У. оғир тан жароҳатлари билан топилиб, туман кўп тармоқли марказий шифохонасига юборилган.
Мазкур ҳолат юзасидан 2019 йил 1 март куни вилоят прокуратураси томонидан ЖКнинг 97-моддаси 2-қисми «а,ж» банди билан жиноят иши қўзғатилган.
Олиб борилган дастлабки тергов ҳаракатлари натижасида фуқаро Н.А. ушбу жиноятни содир этишда гумон қилиниб, ЖПКнинг 221-моддаси тартибида ушланган.
Н.А.га нисбатан 2 март куни ЖКнинг 97-моддаси 2-қисми «а», «ж» бандлари, 164-моддаси 2-қисми «а» банди билан айб эълон қилиниб, қамоққа олиш тарзидаги эҳтиёт чораси қўлланилган.
Ҳозирда мазкур жиноят иши бўйича Тошкент вилоят прокуратураси томонидан дастлабки тергов ҳаракатлари олиб борилмоқда. Терговнинг бориши устидан Бош прокуратура томонидан назорат ўрнатилди.
Сўнгги кунларда ижтимоий тармоқларда мамлакат ҳуқуқ-тартибот органлари фаолияти танқидга олиниб, мудҳиш жиноят қилганларга қарши чора кўрилмагани ҳақида ёлғон маълумотлар тарқалганди.
Изоҳ (0)