«Манчестер Юнайтед» дарвозабони Гиннеснинг рекордлар китобига кирди
Аргентина терма жамоаси ҳамда «Манчестер Юнайтед» дарвозабони Серхио Ромеро янги жаҳон рекордини ўрнатди. Бу ҳақда Manchester Evening News хабар берди.
Футболчи 60 сония ичида майдон марказидан бошқаларга нисбатан кўп гол уриб, Гиннеснинг рекордлар китобига кирди.
Гиннеснинг рекордлар китоби вакили Адам Брауннинг айтишича, фақатгина майдоннинг марказидан берилган зарбалар ҳисобга олинган. Табиийки, зарбалар бўш дарвоза томон берилган.
Ромеродан ташқари «Манчестер Юнайтед»нинг бошқа ўйинчилари ҳам рекордни янгилашга уриниб кўрди. Лекин аргентиналик дарвозабон 20 та гол уриб, ҳаммадан ўзиб кетди.
«Қизиллар» ҳимоячиси Фил Жонс дарвозани 19 марта ишғол қилиб, 2-ўринни эгаллаган бўлса, ярим ҳимоячи Андер Эррера 14 та гол билан 3-поғонани банд қилди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
