«Дарё» жаҳон матбуотида охирги кунларда кўтарилган асосий мавзуларга тўхталиб ўтади.
Биринчи рақамли рус хакерлари
The Times нашри хабарида келтирилишича, ҳукумат томонидан қўллаб келинадиган рус хакерлари Ғарбга душман бўлган гуруҳлар орасида ўз касбдошларининг энг кучлисидир.
Fancy Bears каби хакерлик гуруҳлари Европа ва Америкадаги ҳукумат ва мудофаа инфратузилмаларига йўналтирилган киберҳужумларда айбланади; бу гуруҳлар ўз вирусларини у ёки бу ташкилотнинг ички тармоқ компьютерларига юбориш ва ишдан чиқариш учун ўртача 18 дақиқа 49 сония вақт сарфлайди.
Шимолий кореялик хакерлар давлат тизимларини ишдан чиқариш учун 2 соат 20 дақиқа вақт сарфласа, хитойлик хакерларнинг бунга 4 соатдан ортиқ вақти кетади.
Crowdstrike илмий тадқиқот компанияси тадқиқотчилари рус хакерлари бошқа мамлакатлик рақобатчиларига нисбатан ўртача 8 соат тезроқ ишлашларини аниқлаб ҳайратга тушган.
Хакерлар қанчалик тез ишлай олишини шу пайтгача ҳеч ким тадқиқ қилмаган. Crowdstrike компанияси 2018 йилда уюштирилган 30 мингдан ортиқ хакерлик ҳужуми билан боғлиқ киберҳужумларни атрофлича тадқиқ қилиб чиқди, деб ёзади The Times.
Компания эътирофича, Ғарб ва Америкага уюштирилиган киберҳужумларнинг аксарияти Хитой, Эрон, Россия ва Шимолий Кореяга бориб тақалади.
Жанубий Корея, Ҳиндистон, Вьетнам ва Покистон ҳам хакерлар ҳужуми борасида мудраб ётгани йўқ, деб мақолани якунлайди The Times.
Brexit’сиз яна 21 ой: Брюсселни нима кутмоқда?
Британияда чоп этиладиган The Guardian нашрининг хабарига кўра, Британиянинг Евроиттифоқдан чиқишини истамаётган Брюссель Brexit лойиҳасини 2021 йилгача кечктириш ҳақида бош қотирмоқда.
Нашр мулоқот қилган расмийлар назарида, бюджет, молия ва чиқиш жараёни сабаб Буюк Британиянинг Европа Иттифоқидан чиқиш масаласи борасида яна 21 ой муҳлат бериш ақлли қарор бўлади.
Муҳлат берилиши учун, энг аввало, расмий Лондон буни сўраши талаб этилади.
Газетада ёзилишича, айни пайтда Дональд Туск девонхонасига Британия томонидан бундай ариза келиб тушмаган; бунинг боиси — Евроиттифоқ раҳбарияти бундай вариантни ҳозирча ўйлаб кўргани йўқ.
Brexit масаласини кечиктириш ғояси Даунинг-стритда пайдо бўлган ва бу ғоя масала бўйича кескин фикрларни бераётган айрим консерватив партия тарафдорларини чўчитиб қўйишдан иборат, дейилади материалда.
Газета мулоқот қилган расмийлар наздида, Буюк Британия бош вазири Тереза Мэй мамлакатнинг Европа Иттифоқидан чиқиши борасида кескин фикр билдираётган томонларнинг қарашларини юмшатиб, уларнинг қўллаб-қувватлашига эришишни мақсад қилган.
Олдин ўзингга боқ, кейин ноғора қоқ: Россия Марказий осиёликларни қўрқитиб келмоқда
Кўп йиллардан бери расмий рус манбалари Марказий Осиё вакилларини Афғонистон шимолидан келадиган хавф борасида «огоҳлантириб» келади. Сўнгги уриниш АҚШдан келадиган хавф ҳақида бўлди. Бундай хабарлар билан русийзабон нашрлар Марказий Осиё мамлакатлари ва АҚШ ўртасидаги адоватни кучайтиришни ва ўқувчиларни адаштиришни ният қилган, деб ёзади «Central.Asia-news.com» сайти.
Афғонистон фахрийлари уюшмаси раҳбари, ҳарбий эксперт ва Россия ҳукуматига яқин шахслардан бири бўлган Франц Клинцевич Россиянинг Sputnik агентлигига берган интервьюсида «Марказий Осиё АҚШ махсус кучлари ҳужумига учрайди», деб баёнот берган. Унинг назарида, «АҚШ ҳукумати махсус кучлари афғонистонлик жангариларни Марказий Осиёда тартибсизлик келтириб чиқариш мақсадида Афғонистон шимолида тўпламоқда».
Мазкур чиқиш Ўзбекистон ташқи ишлар вазири Абдулазиз Комиловнинг ҳам диққат-эътиборини тортди. У «Мен 25 йилдан буён Марказий Осиёдаги тинчлик жангарилар томонидан барбод бўлиши мумкинлиги ҳақида эшитиб келаман», дея нашрдаги маълумотга кескин муносабат билдирган. Бу Ўзбекистон расмийлари томонидан билдирилган дастлабки норозилик ифодаси бўлди.
Бу Кремль тараф бўлган нашрларнинг Марказий Осиёни қўрқитишга қаратилган дастлабки ҳаракати эмас. Бундан аввал ҳам, 2018 йилнинг 16 май санасида Кремлга яқин бўлган «Русская весна» интернет-газетасида «Жанг муқаррар: 5 минг жангари аллақачон Ўзбекистонда» номли мақола чоп этган эди. Ўзбекистон ҳукумати бунга раддия сифатида «Ҳеч қандай жангари Афғонистон – Ўзбекистон чегарасида тўпланмаётганлиги»ни хабар берганди.
Россия тарафи рус сайтлари Марказий Осиёнинг хавфсизлик масалалари билан шуғулланишни Марказий осиёликларнинг ўзларига қўйиб бериб, Россияда кенг илдиз отиб кетган коррупция, иқтисодий танглик, санкциялар масаласига аҳамият қаратишса яхшироқ бўлар эди.
Ўзбекистон соғлом овқатланувчи мамлакатлар индексига кира оладими?
Ўзбек халқи гўшт маҳсулотларини жуда яхши кўради, ҳар пайшанба ва якшанбада зиғир ёки қўй ёғига қилинган паловни истеъмол қилишни хуш кўради. Аммо негадир дунёнинг энг соғлом миллатлари рўйхатига кирмайди.
Bloomberg нашрига кўра, испанлар гаспаччо, паэлья (гуруч, жўжа гўшти, денгиз маҳсулотларидан тайёрланадиган таом) истеъмол қилгани учун ҳам 2017 йили ғолиб бўлган италиялик «макаронхўрларни» ортда қолдириб, дунёнинг энг соғлом халқи бўлди.
Bloomberg ўтказган «Энг соғлом мамлакат» индексида 169 давлат иштирок этди. Индексни тузиш пайтида аҳолининг чекишга мойиллиги, семириш, атроф муҳит, тоза ичимлик сувидан фойдланиш имкониятлари, санитария ва гигиена (душ ва ҳожатхоналарнинг канализациялшгани) киритилган.
Мазкур рейтингда ўтган йили биринчи ўринни эгаллаган Италияни Испания пастга тушириб юборди. Испанлар узоқ яшовчилар рўйхатида японлар ва швейцарларгагина ён бермоқда. Вашингтон университетининг тадқиқотларига кўра, Испания IHME кўрсаткичи бўйича Япония, Сингапур ва Швейцарияни қувиб ўтади ва у ерда ўртача умр кўриш ёши 86 ёшга етади.
Bloomberg ўтказган тадқиқот энг аввало аҳолининг овқатланиш одатлари, кунлик қабул қилинаётган калорияларни ҳам ҳисобга олган.
Bloomberg нашри «Ўрта Ер парҳези» деб аталган таомланиш одати туфайли Испания ва Италияда аҳоли зайтун ёғи, дуккакли ўсимликлар меваси билан овқатланиши туфайли юрак-қон томир касалликлари билан оғриганлар миқдорини камайтирганини ёзади.
Масаланинг бир жиҳати шуки, соғлом овқатланиш рўйхатидаги мамлакатлар қаторидан Осиёнинг Япония ва Сингапур давлатлари ҳам ўрин олган.
Ўзбекистон эса соғлом овқатланувчи мамлакатлар қаторига киритилмаган.
Изоҳ (0)