Чеченистон раҳбари Рамзан Қодиров ўзининг Instagram’даги саҳифасида UFC 229 мусобақасида юзага келган жанжалдан сўнг Ҳабиб Нурмагомедовга тайинланган жазо ҳақида гапирди.
Қодировнинг таъкидлашича, Нурмагомедовдек жангчиси борлиги Кавказнинг омади. Бироқ унинг фикрига кўра, россиялик ва «кеккайган ирландиялик провокатор» Конор Макгрегорга тайинланган жазо номутаносибдир.
«Буларнинг барчаси бутун Кавказ халқини хўрлаш ва бизнинг биродарларимиз, уларнинг юзларини лой билан булғаш учун қилинди», — дейди Чеченистон президенти.
Нурмагомедов Кавказнинг чинакам характерини намойиш қилди, дея қўшимча қилади Қодиров.
«Кавказ халқини ёмон кўрувчиларнинг ва улардан қўрқувчиларнинг узоқни кўзловчи режалари амалга ошмади. Гап ишонч, ғурур ва қадр-қиммат ҳақида кетганда, ҳаттоки пул ва шон-шуҳратнинг аҳамияти йўқлигини бу болалар (Ҳабиб ва Абубакар Нурмагомедов ва Зубайра Тухугов) исботлади», — дейди у.
Нурмагомедов — енгил вазн тоифасида UFC чемпиони. Ўтган йилнинг октябрь ойида UFC 229 мусобақаси доирасида бўлиб ўтган чемпионлик учун жангда Ҳабиб Макгрегорни мағлуб этганди. Жангдан сўнг доғистонлик жангчи рақибининг секунданти билан муштлашиб кетган, унинг жамоасидагилар эса Макгрегор билан жанжал уюштирганди.
Натижада Невада штати Атлетика комиссияси Нурмагомедовни 9 ойга жанглардан четлаштирди ва 500 минг доллар жарима белгилади. Абубакар Нурмагомедов ҳамда Тухугов эса 25 минг доллар жарима пули тўлайдиган бўлди ва улар 1 йилга жанглардан дисквалификация қилнди. Макгрегорга 50 минг доллар жарима солинди ҳамда ярим йилга жанглардан четлатилганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)