Самарқанд вилоят ИИБ Йўл ҳаракат хавфсизлиги бошқармаси томонидан ҳайдовчиларнинг ҳушёрлигини янада ошириш мақсадида жойларда «кофе брейк»лар ташкил этилмоқда. Бунда йўл ҳаракати хавфсизлиги ходими ҳайдовчини тўхтатиб, агар у чарчаган ёки уйқуси келаётган бўлса унга кофе ёки чой тутқазиб, унинг ҳушёрлигини оширишга ҳаракат қилмоқда, дея хабар бермоқда «Дарё» мухбири Фарҳод Норбўтаев.
Мазкур эзгулик тадбири вилоятнинг Каттақўрғон, Иштихон ва Оқдарё туманларида ташкил этилиб, 40 та автомашина ҳайдовчилари тўхтатилиб, ҳайдовчи ва йўловчиларга чой ва кофе улашилди. Транспорт воситалари эгалари ҳам, йўловчилар ҳам бундан мамнун бўлди.
– Бугун транспорт воситаларининг сони кун сайин ортиб бормоқда. Кўриниб турибдики ушбу ўзгаришлар йўлларда ҳаракатланиш жараёнларига ҳам таъсир этмай қолмайди. Сиз-у биздан йўлларда ҳаракатланаётганда белгиланган тартиб ва меъёрларга амал қилиш масъулияти талаб этилади, – дейди вилоят ИИБ ЙҲХБ матбуот хизмати раҳбари Равшан Номозов. – Мақсадимиз кўнгилсиз воқеаларнинг олдини олиб ҳайдовчи ва йўловчиларни манзилига эсон-омон, соғ-саломат етиб олишларини таъминлаш ҳисобланади.
Изоҳ (0)