Навоий вилояти Хатирчи туманининг «Авоқли» маҳалласида 5 йилдан буён кутилаётган боғча қурилишига старт берилди. Бу ҳақда вилоят ички ишлар бошқармаси бошлиғи Рустам Турсунов маҳаллада ташкил этилган сайёр қабул жараёнида айтиб ўтди, деб хабар беради журналист Дилдора Каттаева.
Хатирчи туманининг «Авоқли» маҳалласида бугунги кунда 2700 нафар фуқаро ва 620 та хонадон мавжуд. Ҳудудда боғча ёшидаги 587 нафар бола бор. Маҳалла раиси Муҳиддин Ўриновнинг айтишича, маҳалладаги 12 нафар болагина «Авоқли»дан 7 км узоқликда жойлашган Хатирчи туманининг Кўксарой массивидаги болалар боғчасига боради. Уларнинг ота-оналари имконияти бўлгани учун фарзандларини енгил машинада мактабгача таълим муассасасига олиб бориб қайтади.
«Маҳалламизда болалар боғчаси йўқ. Бу ёшдаги фарзандларимизнинг кўпчилиги уйда ўтиради. Кимдир бирор юмуш билан кўчага чиқса боласини қўшнисиникага ташлайди, — дейди маҳалла фуқароси Кенжаев Нарзулло. — Биз 5–6 йилдан буён шу ерда бир боғча қуриш орзуси билан кўплаб ташкилотларга мурожаат қилдик. Бугун секторимиз раҳбари сайёр қабулда қишлоқнинг 5 йиллик орзуси ва ниҳоят амалга ошаётганини айтди. Буни эшитиб уйда ўтирган аёлларимиз ҳам боғча қурилиб, боласини қўйишга жой бўлгандан кейин ишга чиқишни, тадбиркорлик қилишни ўйламоқда».
Вазирлар Маҳкамасининг «2018–2019 йилларда Навоий вилоятининг Хатирчи туманини комплекс ривожлантириш чора-тадбирлари тўғрисида»ги 892-сонли қарорига асосан Авоқли қишлоғида 75 ўринга мўлжалланган лойиҳа қиймати 3,85 миллиард сўм бўлган мактабгача таълим муассасаси қуриш белгиланган. Айни пайтда MTM қуриш бўйича кўрсатилган жойлар ва аҳоли шароити ўрганилиб, дастлабки қурилиш учун зарур чоралар кўрилмоқда.
Вилоят ИИБ бошлиғи томонидан ташкил этилган сайёр қабул жараёнида нафақат «Авоқли» маҳалласида боғча қуриш масаласи балки, фуқароларни иш билан таъминлаш, қишлоқдаги «Авоқли», «Тинчлик» ва «Навоий» кўчаларини кесиб ўтувчи йўлларни таъмирлаш ишлар бўйича ҳам мутасадди ташкилот вакилларига аниқ вазифалар тақсимлаб берилди.
Изоҳ (0)