Ўзбекистон Республикаси Мактабгача таълим вазирлиги Андижон вилоятининг Бўтақора қишлоғидаги 11-сонли мактабгача таълим муассасасидаги вазиятни ўрганиб чиқди ва қуйидаги маълумотларни тақдим этди. Аввалроқ Андижон туманидаги 11-MTM аянчли аҳволда эканлиги ҳақида хабар берилган эди.
Мактабгача таълим муассасаси жойлашган «Оқ Равот» маҳалласида 3 ёшдан 7 ёшгача бўлган болалар сони 609 кишини ташкил этади. 11-MTM 1954 йилда қурилган бўлиб, у болалар боғчаси учун мослашмаган бинода жойлашган. У 70 та ўринга мўлжалланган, аммо рўйхат бўйича унга 75 нафар бола қатнайди. Бино 2019 йилда реконструкция қилиш учун давлат инвестиция дастурига киритилмаган, чунки уни бузиш ва ўрнида янги бино қуриш режалаштирилган.
Қурилиш ишлари апрель ойидан бошлаб Андижон вилоят ҳокимининг ташаббуси билан маҳаллий бюджет маблағлари ҳисобидан олиб борилади. «Оқ Равот» маҳалласида бошқа MTMларгача бўлган масофанинг узоқлиги ва шу билан бирга болалар сонининг кўплиги ҳозирча 11-сон мактабгача таълим муассасасининг тўлиқ ёпилишига имкон бермайди. Ҳозирги вақтда мазкур MTMда енгил таъмирлаш ишлари амалга оширилди.
Андижон вилояти бўйича статистика
Андижон вилоятида 3 ёшдан 7 ёшгача бўлган 204 944 бола истиқомат қилади. Мактабгача таълим билан қамраб олинган болалар сони 2018 йилга келиб 84 411 нафарга етди, бу эса 2017 йилга нисбатан 13,5 фоиз ўсишни ташкил этади (жорий 41,2 фоиз ўрнига 27,7 фоиз). 2018 йилда Андижон вилоятида 104 та мактабгача таълим муассасаси реконструкция қилинди ва таъмирланди, бу сўнгги йиллардаги энг юқори кўрсаткичдир. Андижон шаҳрида «Обод қишлоқ» давлат дастури доирасида 26 мактабгача таълим муассасасида қурилиш-таъмирлаш ишлари олиб борилди ва 2 та MTM таъмирланди. Таъмирлаш ишларининг умумий қиймати 47 миллиард 810 миллион сўмни ташкил этди. Маҳаллий бюджет маблағлари ҳисобидан 37 та мактабгача таълим муассасаси капитал таъмирланди ва 57 та MTMда ўрта мураккабликдаги таъмирлаш ишлари амалга оширилди. 87 та MTMда иситиш қозонлари алмаштирилди ва иситиш тизими тўлиқ қайта жиҳозланди. Харажатларнинг умумий қиймати 71 миллиард 200 миллион сўмни ташкил этди.
Изоҳ (0)