“Daryo” surishtiruvidan keyin Maktabgacha ta’lim vazirligi Andijondagi bog‘cha ahvolini o‘rganib chiqdi

O‘zbekiston Respublikasi Maktabgacha ta’lim vazirligi Andijon viloyatining Bo‘taqora qishlog‘idagi 11-sonli maktabgacha ta’lim muassasasidagi vaziyatni o‘rganib chiqdi va quyidagi ma’lumotlarni taqdim etdi. Avvalroq Andijon tumanidagi 11-MTM ayanchli ahvolda ekanligi haqida xabar berilgan edi.

Maktabgacha ta’lim muassasasi joylashgan “Oq Ravot” mahallasida 3 yoshdan 7 yoshgacha bo‘lgan bolalar soni 609 kishini tashkil etadi. 11-MTM 1954-yilda qurilgan bo‘lib, u bolalar bog‘chasi uchun moslashmagan binoda joylashgan. U 70 ta o‘ringa mo‘ljallangan, ammo ro‘yxat bo‘yicha unga 75 nafar bola qatnaydi. Bino 2019-yilda rekonstruksiya qilish uchun davlat investitsiya dasturiga kiritilmagan, chunki uni buzish va o‘rnida yangi bino qurish rejalashtirilgan.

Qurilish ishlari aprel oyidan boshlab Andijon viloyat hokimining tashabbusi bilan mahalliy budjet mablag‘lari hisobidan olib boriladi. “Oq Ravot” mahallasida boshqa MTMlargacha bo‘lgan masofaning uzoqligi va shu bilan birga bolalar sonining ko‘pligi hozircha 11-son maktabgacha ta’lim muassasasining to‘liq yopilishiga imkon bermaydi. Hozirgi vaqtda mazkur MTMda yengil ta’mirlash ishlari amalga oshirildi.

Andijon viloyati bo‘yicha statistika

Andijon viloyatida 3 yoshdan 7 yoshgacha bo‘lgan 204 944 bola istiqomat qiladi. Maktabgacha ta’lim bilan qamrab olingan bolalar soni 2018-yilga kelib 84 411 nafarga yetdi, bu esa 2017-yilga nisbatan 13,5 foiz o‘sishni tashkil etadi (joriy 41,2 foiz o‘rniga 27,7 foiz).  2018-yilda Andijon viloyatida 104 ta maktabgacha ta’lim muassasasi rekonstruksiya qilindi va ta’mirlandi, bu so‘nggi yillardagi eng yuqori ko‘rsatkichdir. Andijon shahrida “Obod qishloq” davlat dasturi doirasida 26 maktabgacha ta’lim muassasasida qurilish-ta’mirlash ishlari olib borildi va 2 ta MTM ta’mirlandi. Ta’mirlash ishlarining umumiy qiymati 47 milliard 810 million so‘mni tashkil etdi. Mahalliy budjet mablag‘lari hisobidan 37 ta maktabgacha ta’lim muassasasi kapital ta’mirlandi va 57 ta MTMda o‘rta murakkablikdagi ta’mirlash ishlari amalga oshirildi. 87 ta MTMda isitish qozonlari almashtirildi va isitish tizimi to‘liq qayta jihozlandi. Xarajatlarning umumiy qiymati 71 milliard 200 million so‘mni tashkil etdi.