Ташқи ишлар вазирлигида Ўзбекистон Республикаси Президенти маслаҳатчиси Абдужаббор Абдувоҳидов ва мамлакатга Москва давлат халқаро муносабатлар институти (МГИМО) делегациясига бошчилик қилиб келган мазкур олий таълим муассасасининг проректори Aртём Мальгин ўртасида учрашув бўлиб ўтди. Бу ҳақда ТИВ матбуот хизмати хабар бермоқда.
Қайд этилишича, учрашувда томонлар баҳорда пойтахтда МГИМО битирувчиларининг V халқаро форумини ўтказишни муҳокама қилган, МГИМО Тошкент филиали фаолиятини йўлга қўйиш бўйича аввал эришилган келишувларни амалга оширишнинг бориши, бинони таъмирлаш ва ўқув анжомлари билан таъминлаш билан боғлиқ масалалар юзасидан фикр алмашган.
Хабарга кўра, МГИМОнинг Тошкент филиали жорий йилнинг сентябрь ойидан бакалавриат ва магистратура йўналишлари бўйича тўлақонли фаолият кўрсата бошлаши режалаштирилмоқда.
Маълумот ўрнида, МГИМО битирувчиларининг «Биргаликда келажак сари» номли I умумжаҳон форуми 2013 йилда Боку шаҳрида ўтказилиб, унда мазкур таълим муассасасининг 25 давлатдан келган 400 га яқин битирувчилари иштирок этган бўлган.
Изоҳ (0)