Профессионал бокснинг биринчи ярим енгил (-55,34 кг) вазн тоифасида рингга чиқаётган ўзбекистонлик Муроджон Аҳмадалиев (5 та жанг, 5 та ғалаба, 1 та нокаут) WBA жаҳон чемпионлиги камари учун рингга чиқиши бўйича савдо музокаралари бир ҳафтага кечиктирилди. Бу ҳақда GoSport хабар берди.
Аҳмадалиев ва мазкур йўналиш бўйича чемпион, америкалик Даниэл Романга (26 та ғалаба, 2 та дуранг, 1 та мағлубият) қарши жанг ўтказиш учун мажбур даъвогар бўлганди. Икки томон промоутерлари жангни ташкил қилиш бўйича музокараларни келиша олмагач WBA 6 февраль куни жангни ташкил қилиш бўйича савдоларни бошлаши керак эди.
Роман промоутерлари боксчининг IBF камари соҳиби австралиялик Теренс Доэнига (21 та жанг, 21 та ғалаба) қарши иккита камарни бирлаштирувчи жангни ташкил қилиш бўйича музокаралар олиб бораётганини билдиргач, WBA Роман-Аҳмадалиев жанги учун очиқ савдоларини бир ҳафтага ортга сурди. Эндиликда Роман 13 февралгача келгуси жанги бўйича маълумот бериши керак бўлади.
Муроджон Аҳмадалиев шуғулланаётган «Мир бокса« промоутерлик компанияси менежери Вадим Корниловнинг маълум қилишича, вазият ўзгармайди.
«Агар Роман Доэни билан жанг бўйича келишувга эришилган тақдирда ҳам Муроджон биринчи даъвогар бўлиб қолаверади. Агар жанг дуранг билан тугайдиган бўлса, Муроджон аниқ Романнинг кейинги рақиби бўлади. Агар у ғалаба қозонадиган бўлса, Аҳмадалиев бир йўла WBA ва IBF камарлари учун жанг қилиш имкониятига эга бўлади. Йил охирига қадар биз чемпионлик жангини ташкил этишни режа қилганмиз. Ҳозир эса WBA’нинг сўнгги қарорини кутмоқдамиз», — дейди Корнилов.
Маълумотларга кўра, Роман-Доэни жанги апрель ойларида бўлиб ўтиши мумкин. Агар шундай бўлган тақдирда Муроджон Аҳмадалиев эса август сентябрь ойларида чемпионлик камари учун рингга чиқади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)