Андижонда тарғибот декадаси 9 мингдан зиёд ёшларни қамраб олди

Жорий йилнинг 20—30 январь кунлари Андижон вилоятининг ҳамма туман ва шаҳарларида «Барчаси ўз қўлингда!» шиори остида ёшлар тарғибот декадаси бўлиб ўтди. Бу ҳақда Ўзбекистон ёшлар иттифоқи Андижон вилоят Кенгашининг пресс клуб етакчиси Авазбек Араббоев «Дарё»га хабар бермоқда.

10 кун давом этган тадбирда кўплаб лойиҳалар ташкил этилиб, 9 мингдан зиёд ёшлар қамраб олинди.

Содир этилаётган ҳуқуқбузарликлар олдини олиш борасида вилоят миқёсида 36 маротаба «Тунги рейдлар» ўтказилиб, унда 60 дан ортиқ вояга етмаганларнинг тунда бемақсад юрганлиги аниқланди ва уларга нисбатан тегишли тартибда чоралар кўрилди.

«Ҳоким ва ёшлар» учрашувларида 2270 нафар йигит-қизлар қатнашди. Улар томонидан 647 та муаммо ва таклифлар билдирилиб, шундан 386 та мурожаатлар жойида ҳал этилди, қолганлари бўйича эса тегишли чора-тадбирлар белгиланиб ижрога қаратилди.

Вояга етмаганлар орасида ҳуқуқбузарлик ва жиноятчиликнинг олдини олиш, уларни соғлом муҳитга қайтариш ва доимий назоратда бўлишларини таъминлаш мақсадида «Ҳуқуқ ва бурч» тарғибот тадбирлари ҳам уюштирилди. Унда малакали мутаҳассислар томонидан ёшларга керакли тушунча ва маълумотлар берилди.

Тарғибот декадаси давомида назоратсиз қолган ва кўчада мақсадсиз юрган, вояга етмаган ёшлар иштирокида психологик суҳбатлар, очиқ мулоқотлар, шунингдек, «Мен касб танлайман» шиори остида меҳнат ярмаркалари ва тренинглар, спорт мусобақалари ҳам ташкил этилди.