Венесуэлада саккиз кун ичида янги «адолатли, эркин ва шаффоф» президент сайловлари санаси белгиланмаса, Испания, Франция ва Германия ҳукуматлари Венесуэла парламенти раҳбари Хуан Гуаидони Венесуэла муваққат президенти сифатида тан олади.
Худди шундай баёнот билан 26 январь куни Испания бош вазири Педро Санчес чиқиш қилди. Шунингдек, Франция президенти Эмманюел Макрон ва Германия ҳукумати вакили Мартина Фиц ҳам ўхшаш баёнотлар берган.
Санчеснинг изоҳлашича, Европа Гуаидо раҳбарлик қилаётган Венесуэла Миллий ассамблеясининг қонунийлигини тан олади ва, айни вақтда, 2018 йил май ойида бўлиб ўтган ва Николас Мадуронинг ғалабаси билан тугаган Венесуэла президенти сайлови ва унинг натижаларини тан олмайди.
Европа Иттифоқининг ташқи ишлар масалалари бўйича олий вакили Федерика Могерини ҳам, агар яқин вақт ичида янги сайловлар эълон қилинмаса, Евроиттифоқ «Венесуэла конституциясининг 233-моддасига мувофиқ, мамлакатнинг янги етакчисини тан олиши»ни маълум қилган. Айнан шу модда айрим фавқулодда ҳолатларда парламент раҳбарига президентлик ваколатлари беришни назарда тутади.
Ўзини мамлакатнинг муваққат президенти деб эълон қилган Венесуэланинг мухолифатчи кайфиятдаги парламенти раҳбари Хуан Гуаидо АҚШ ва Жанубий Американинг аксарият мамлакатлари томонидан қўллаб-қувватланмоқда. Россия, Туркия, Мексика ва бошқа бир мамлакатлар эса Николас Мадуронинг тарафини олмоқда.
Изоҳ (0)