Ўзбекистон карате федерацияси собиқ президенти Нурхон Нафасовга нисбатан жиноят иши қўзғатилган, деб ёзмоқда МОҚ матбуот хизмати.
Қайд этилишича, Ўзбекистон миллий олимпия қўмитаси тақдим этган маълумотлар асосида 2018 йилнинг 16 ноябрь куни Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаменти томонидан Ўзбекистон карате федерациясининг собиқ раиси Нурхон Нафасов ва бошқаларга нисбатан Ўзбекистон Республикаси Жиноят Кодексининг 167-моддаси (Ўзлаштириш ёки растрата йўли билан талон-торож қилиш) 3-қисми «а» банди ва 165-моддаси (Товламачилик) 1-қисми билан жиноят иши қўзғатилган.
МОҚ хабарига кўра, тергов жараёнида амалга оширилган тафтиш натижасида ноқонуний хатти-ҳаракатлар тўғрисидаги бирламчи маълумотлар ўз тасдиғини топган.
Нафасов федерация раиси лавозимига тайинланган кун – 2018 йил 16 майдан бошлаб октябрь ойигача 125 миллион 557 минг сўмлик пул маблағини белгиланган тарзда (терма жамоа аъзолари, уларни мусобақаларга тайёрлаш ҳаражатлари) сарфлаш ўрнига, уларни мақсадсиз ва ортиқча ишлатганлиги, товламачилик ва ҳужжатларни қалбакилаштиришга йўл қўйилганлиги, спортчилардан бадал пулларини йиғиб олиб, федерация ғазнасига кирим қилинмаганлиги аниқланган. Айни пайтда тергов ҳаракатлари давом этмоқда, дейилади МОҚ хабарида.
Маълумот учун, Нурхон Нафасов Марказий Осиёда карате бўйича қора белбоғ 6-дан соҳиби бўлган илк ва ягона спортчидир. У 1996—2006 йиллар оралиғида федерация президенти бўлган. Бу даврда жуда кўплаб чемпионлар етишиб чиққан. Республика бўйлаб карате билан шуғулланувчилар сони 70 мингдан ортиб кетганди.
Эслатиб ўтамиз, Нурхон Нафасов билан боғлиқ ҳолат борасида «Kun.uz» нашри ўтган йил октябрь ойида ёзганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)