Самарқанд ҳокимлиги янги йил кечасини шаҳарда ўтказган сайёҳлар бўйича статистикани чоп этди. Бу ҳақда «Podrobno.uz» нашри хабар берди.
«23—28 декабргача шаҳар меҳмонхоналарида 856 нафар сайёҳ тунаб қолган. 29 декабрдан 3 январгача эса меҳмонхоналарда 1606 нафар сайёҳ рўйхатдан ўтган. Улар орасида россиялик сайёҳлар 588 нафарни, Афғонистон — 198 ва Япония — 166 сайёҳни ташкил қилди.
Ушбу кўрсаткич бир йил аввалги билан таққослаганда 790 нафар сайёҳни ташкил қилган. Шундай экан, сайёҳлар сони бир йилда икки карра ошганини кўриш мумкин», — дейилади Туризмни ривожлантириш давлат қўмитаси маълумотларида.
Сайёҳлар сонининг ошиши авиачипталарга жорий қилинган чегирмалар ҳамда янги йилда дам олиш кунларининг узайтирилгани билан боғлиқ.
Россия туризм индустрияси иттифоқи президенти Сергей Шпилько тез орада Ўзбекистон—Россия бозорида туризм бўйича «портлашини» маълум қилганди.
«Йўналиш бунга тайёр, у европаликлар орасида машҳур, Россия учун ҳам худди шундай талабгир бўлади», — дейди у.
Эслатиб ўтамиз, 2018 йилнинг дастлабки тўққиз ойида Ўзбекистонга 360 минг нафар россиялик ташриф буюрган, 2017 йилда уларнинг сони 270 минг нафарни ташкил қилганди.
Изоҳ (0)