Ўзбекистон Соғлиқни сақлаш вазирлиги томонидан тиббиёт муассасалари, жумладан, туғуруқ комплексларида тамагирлик ва коррупция ҳолатлари чуқур ўрганилиб, таҳлил этилган ҳолда тизимли чоралар кўриб борилмоқда, дейилади ЎзА хабарида.
Чунончи, Президент қарори асосида давлат тиббиёт муассасалари тиббиёт ва фармацевтика ходимларининг меҳнатига ҳақ тўлаш миқдорлари 2018 йил 1 декабрдан 1,2 баравар ошган бўлса, 2019 йил 1 апрелдан 1,15 баравар ошириладиган бўлди. Бу борадаги ишларни тизимли йўлга қўйиш, тиббиёт ходимларининг меҳнатини муносиб рағбатлантириш мақсадида Соғлиқни сақлаш вазирлиги ҳузурида Ривожлантириш ва соғлиқни сақлашни бошқариш органлари ходимларини моддий рағбатлантириш жамғармаси тузилди.
Бундан ташқари, ҳар бир шифокорнинг ишига қараб баҳолаш, муассасаларни даволанганлик ҳолати бўйича молиялаштириш, аудит ва ички текширув тизимини янада такомиллаштириш, энг муҳими, жамоатчилик ва депутатларнинг тизимли назорати йўлга қўйилмоқда. «Ишонч телефони», турли мурожаат ва шикоятлар учун «Фикр билдириш» қутиси, ходимлар ва беморлар ўртасида сўровномалар ўтказиш, видеокузатув мосламаларини ўрнатиш каби чоралар ҳам кўрилмоқдаки, бу ҳам бўлса соҳадаги турли тамагирлик ва коррупция ҳолатларига чек қўйилишига хизмат қилади.
Соғлиқни сақлаш вазирлиги томонидан тизимдаги тиббиёт муассасалари, жумладан, туғуруқ комплексларидаги вазиятни назорат қилиб бориш, коррупция ва тамагирлик ҳолатларига йўл қўймаслик ва олдини олиш мақсадида кўплаб вазифалар белгилаб олинди. Шу асосда мамлакатдаги барча туғруқ муассасаларида фаолият олиб бораётган обрўли ва тажрибали ходимлардан иборат «Устозлар кенгаши» гуруҳлари тузилди.
Туғуруқ комплексларидаги беморлар орасида эса аноним сўровнома ўтказиш борасида ташкиллаштирилган «Фикр билдириш» қутиларини ўрганиш ишлари олиб борилмоқда. Туғуруқ муассасаларида чақалоқларни уйга кузатув хоналарига қўшимча равишда видеокузатув мосламалари ўрнатилди.
Шифохонада пуллик хизмат ва сервис хизматидан фойдаланувчи беморлар билан тўлов шартномаси қонунда белгиланган тартибда амалга оширилиши ташкил этилди. Шунингдек, ультратовуш текширувларини пуллик ва бепул аҳоли қатлами учун ўрнатилган тартибда алоҳида ташкил этиш чоралари кўрилди.
Изоҳ (0)