Ўзбекистон Қуролли Кучлари академиясида «Очиқ эшиклар куни» муносабати билан Тошкент ахборот технологиялари касб-ҳунар коллежи ҳамда Тошкент давлат аграр университети қошидаги академик лицей ўқувчилари учун экскурсия уюштирилди. Бу ҳақда Мудофаа вазирлиги матбуот хизмати «Дарё»га маълум қилди.
Эслатиб ўтамиз, Ўзбекистон Президенти Шавкат Мирзиёев 28 ноябрь куни Хавфсизлик кенгашининг кенгайтирилган таркибда ўтказилган йиғилишида ёшларда ҳарбий-ватанпарварлик руҳини шакллантириш масаласига алоҳида эътибор қаратиш лозимлигини таъкидлаганди.
Ушбу топшириқлар ижроси юзасидан ўтказилган экскурсия давомида ўқувчи ёшлар академия фаолияти, курсантларнинг яшаши ва билим олиши учун яратиб берилган имкониятлар билан яқиндан танишди. Қуролли Кучлар академияси тарихига бағишлаб ишланган фильм ҳамда академия музейи ёшларда катта қизиқиш уйғотди.
Бундан ташқари шу каби тадбирлар Тошкент вилоятидаги ҳарбий қисмлардан бирида ҳам ўтказилди. Тошкент вилояти Қибрай тумани Чингелди маиший хизмат ҳамда Қибрай қишлоқ хўжалик касб-ҳунар коллежи ўқувчилари қатнашган тадбирда ўқувчи ёшлар ҳарбий қисмда бўлди. Ўқув хоналари, ошхона, спорт мажмуаси ва ётоқхоналардаги шароитлар билан танишди. Ҳарбий қисм электрон тирида эса нишонларга ўқ отиш бўйича маълумот ва кўникмалар берилди. У ерда жанговар тайёргарлик машғулотларида зарур бўлган асбоб-ускуналар, қуроллар ҳамда ҳимоя воситалари кўргазмаси ҳам ташкил этилди.
Шунингдек, кун давомида Тошкентдаги 248- ҳамда 18-сонли умумтаълим мактабларида «Аскар мактаб меҳмони» мавзусида очиқ дарслар уюштирилди.
Даср жараёнида ҳарбий хизматчилар ўқувчиларга ҳарбий касб нуфузи ва масъулияти ҳақида, шунингдек, ҳарбий хизматчиларга давлатимиз томонидан кўрсатилаётган эътибор, яратилаётган имтиёзлар хусусида маълумотлар берилди. Ўқувчиларга автоматни қисмларга ажратиш ва йиғиш ҳамда оммавий қирғин қуролларидан фойдаланиш бўйича йўл-йўриқлар кўрсатиб ўтилди.
Изоҳ (0)