Жорий йилнинг 12-октябр куни жиноят ишлари бўйича Яккасарой туман судида судланувчилар Мурод Хонтўраев, Д.Ваҳобов ва И.Парпиевга нисбатан жиноят ишини кўриб чиқиш бўйича суд жараёни ниҳоясига етди ва суд ҳукми эълон қилинди. Бу ҳақда Repost’га Олий суд расмий вакили Азиз Абидов маълум қилган.
Суд жиноят иши материалларини ҳар томонлама ва тўлиқ ўрганиб Мурод Хонтўраев ва Д. Ваҳобовни Жиноят кодексининг 277-моддаси («Безорилик») 3 қисми «а» банди, И. Парпиевни Жиноят кодексининг 168-моддаси («Фирибгарлик») 1 қисми ва 277-моддаси («Безорилик») 2 қисми «а», «б», «в» бандларида кўзда тутилган жиноятларни содир этишда айбдор деб топди.
Жиноят ишлари бўйича Яккасарой туман суди Мурод Хонтўраевга энг кам ойлик иш ҳақининг (172 240 сўм ҳисобида) 94 баробари миқдорида 16 190 560 сўм жарима жазоси, Д. Ваҳобовга 3 йил 8 кун муддатга озодликни чеклаш жазоси, И. Парпиевга ойлик иш ҳақидан 20% давлат фойдасига ушлаб қолган холда 2 йил 1 ой 24 кун муддатга аҳлоқ тузатиш ишлари жазоси тайинлади.
Шунингдек, суд томонидан судланувчиларга ва бошқа томонларга ҳукм устидан шикоят қилиш тартиби ва муддати тушунтирилди.
Мурод Хонтўраев — MMA бўйича Жаҳон чемпиони, «Осиё айиғи» лақаби билан дунёга танилган. Айни пайтга қадар 11 та жанг ўтказиб, улардан 8 тасида (6 тасини нокаут билан) ғалаба қозонган.
Изоҳ (0)