The Sun Британия ҳукуматидаги манбасига таяниб, Россия Ливияга ўнлаб махсус топшириқли бўлинмалар жангчиларини ва Бош штаб бош бошқармасининг бошқа ходимларини юборганини маълум қилди, деб ёзади Meduza.
Россиянинг Ливиядаги контингенти мамлакат шарқини назорат қилувчи фелдмаршал Халифа Хафтарнинг қўшинларини тайёрлаш билан шуғулланади. Шунингдек, Россия Хафтарнинг армиясига қурол етказиб беради. Бундан ташқари, Ливия шарқида Россиянинг иккита ҳарбий базаси бор, деб ёзади The Sun.
Британия махсус хизматлари бош вазир Тереза Мейни Россиянинг Ливиядаги эҳтимолий фаоллиги ҳақида огоҳлантирган. Уларнинг фикрича, Москва Африка мамлакатини «янги Сурия»га айлантирмоқчи. Нашр маълумотларига кўра, Россия Европага Ливия орқали йўл олган ноқонуний муҳожирлар оқимини, шунингдек, ушбу мамлакатдан нефть экспортини назорат остига олмоқчи.
Россиялик ҳарбийларнинг Ливиядаги иштирокини «РБК»нинг Россия мудофаа вазирлиги ва Ливия ҳукуматига яқин манбаси ҳам тасдиқлади. Аммо Давлат думасининг мудофаа бўйича қўмитаси раиси ўринбосари Юрий Швиткин Ливияда россиялик ҳарбийлар йўқлигини таъкидлаб, Ливияни «янги Сурия»га айлантириш режалари ҳақидаги хабарни рад этди.
Изоҳ (0)